Indian Cricket Team: भारताचा स्टार अष्टपैलू खेळाडू हार्दिक पंड्या (Hardik Pandya) पुन्हा एकदा भारतीय टी-२० संघाच्या कर्णधारपदाच्या शर्यतीत आल्याची माहिती समोर आली आहे. सध्याचा कर्णधार सूर्यकुमार यादवचा खराब फॉर्म आणि हार्दिकचा सातत्यपूर्ण खेळ यामुळे बीसीसीआयच्या अधिकाऱ्यांमध्ये ही चर्चा रंगली आहे.
हार्दिक पंड्या टी-२० संघाच्या कर्णधारपदी परतणार?
हार्दिक पंड्या २०२२ ते २०२४ दरम्यान अनेकदा भारताचा (Indian Cricket Team) टी-२० संघ कर्णधार म्हणून नेतृत्व करत होता. मात्र, २०२४ टी-२० विश्वचषकानंतर रोहित शर्मा टी-२० क्रिकेटमधून निवृत्त झाल्यानंतर बीसीसीआयने सूर्यकुमार यादवला कर्णधारपदी नियुक्त केले.
मात्र, सूर्यकुमार यादवचा (Suryakumar Yadav) खराब फॉर्म आणि त्याच्या फलंदाजीतील सातत्याचा अभाव यामुळे बीसीसीआय आता हार्दिकला परत कर्णधार बनवण्याच्या विचारात आहे. दैनिक जागरणच्या अहवालानुसार, बीसीसीआयमधील काही वरिष्ठ अधिकारी आणि मुख्य प्रशिक्षक गौतम गंभीर यांना वाटते की हार्दिकवर अन्याय झाला आहे आणि तो संघाच्या कर्णधारपदासाठी योग्य पर्याय असू शकतो.
सूर्यकुमार यादवच्या खराब फॉर्ममुळे बीसीसीआयचा निर्णय बदलणार?
काही वर्षांपूर्वी सूर्यकुमार यादव ICC टी-२० फलंदाजांच्या क्रमवारीत अव्वल स्थानी होता. मात्र, कर्णधारपद स्वीकारल्यानंतर त्याचा फॉर्म मोठ्या प्रमाणात घसरला आहे. गेल्या १४ डावांत त्याने फक्त २५८ धावा केल्या असून सरासरी १८.४२ आहे.
इंग्लंडविरुद्ध (IndvEng) नुकत्याच झालेल्या मालिकेत सूर्यकुमार यादव पाच डावांत फक्त २८ धावा करू शकला, ज्यात दोन डक समाविष्ट होते. या खराब कामगिरीमुळे संघ व्यवस्थापनाचा विश्वास कमी होत आहे आणि हार्दिकला पुन्हा संधी देण्याची शक्यता निर्माण झाली आहे.
हार्दिक पंड्याला आधी का कर्णधारपद मिळाले नाही?
बीसीसीआयचे निवड समिती प्रमुख अजित आगरकर (Ajit Agarkar) यांनी मागील वर्षी स्पष्ट केले होते की, हार्दिकची फिटनेस ही मोठी समस्या असल्याने त्याला कर्णधारपद देण्यात आले नाही.
“हार्दिक हा आमच्यासाठी खूप महत्त्वाचा खेळाडू आहे. मात्र, त्याच्या फिटनेसबाबत सतत समस्या निर्माण होत असल्याने त्याच्यावर विश्वास ठेवणे कठीण होते. आम्हाला असा कर्णधार हवा होता जो सातत्याने उपलब्ध असेल. त्यामुळे सूर्यकुमार यादवकडे जबाबदारी देण्यात आली,” असे आगरकर म्हणाले होते.
हार्दिक पंड्याला पुन्हा संधी मिळणार?
बीसीसीआयमधील (Indian Cricket Team) काही वरिष्ठ अधिकाऱ्यांचे आणि गौतम गंभीरचे मत आहे की हार्दिकवर अन्याय झाला आहे. सूर्यकुमार यादवच्या सातत्यहीन फॉर्ममुळे बीसीसीआयला कर्णधारपदावर पुनर्विचार करावा लागत आहे. त्यामुळे आगामी टी-२० मालिकांसाठी हार्दिक पुन्हा संघाचे नेतृत्व करताना दिसू शकतो.
