ATM Cash Withdrawal l जर तुम्ही दर महिन्याला एटीएममधून पैसे काढत असाल किंवा डिजिटल पेमेंटऐवजी रोख व्यवहार करत असाल तर ही बातमी तुमच्यासाठी धक्कादायक ठरू शकते. कारण, एटीएममधून पैसे काढणे आता महाग होऊ शकते. रिझर्व्ह बँक एटीएममधून पैसे काढण्यासाठीचे शुल्क वाढवण्याच्या तयारीत आहे. चला तर मग जाणून घेऊया संपूर्ण प्रकरण…
काय आहे संपूर्ण प्रकरण? :
सध्या रिझर्व्ह बँक महिन्याला 5 वेळा मोफत पैसे काढण्याची सुविधा देते. परंतु आता आरबीआय या 5 व्यवहारांच्या मर्यादेपेक्षा जास्त व्यवहार केल्यास आकारले जाणारे शुल्क आणि एटीएम इंटरचेंज शुल्क वाढवण्याचा विचार करत आहे. तुम्हाला एटीएममधून पैसे काढण्यासाठी जास्त पैसे खर्च करावे लागतील.
ATM Cash Withdrawal l किती वाढणार शुल्क? :
एनपीसीआयने पाच वेळा मोफत मर्यादा संपल्यानंतर पैसे काढण्यासाठीचे शुल्क सध्याच्या 21 रुपयांवरून वाढवून 22 रुपये करण्याची शिफारस केली आहे. याव्यतिरिक्त, एनपीसीआयने रोख व्यवहारांसाठी एटीएम इंटरचेंज शुल्क 17 रुपयांवरून 19 रुपये करण्याची शिफारस केली आहे.
इंटरचेंज शुल्क म्हणजे काय? :
एका मर्यादेनंतर दुसऱ्या बँकेच्या एटीएममधून पैसे काढल्यावर इंटरचेंज शुल्क आकारले जाते. म्हणजेच, एटीएम सेवा वापरल्याबद्दल एका बँकेकडून दुसऱ्या बँकेला दिलेली फी म्हणजे इंटरचेंज फी.
आरबीआयची बैठक :
रिपोर्टनुसार, बँक आणि व्हाइट-लेबल एटीएम ऑपरेटर मेट्रो आणि नॉन-मेट्रो शहरांमध्ये शुल्क वाढवण्याच्या एनपीसीआयच्या शिफारशीशी सहमत आहेत. परंतु अद्याप या प्रकरणात भारतीय रिझर्व्ह बँक आणि एनपीसीआयने कोणतीही अधिकृत प्रतिक्रिया दिलेली नाही.
एटीएम चालवण्याचा खर्च वाढतोय :
रिपोर्टनुसार, वाढती महागाई आणि गेल्या दोन वर्षांमध्ये 1.5-2 टक्क्यांच्या दराने वाढणारी कर्जाची किंमत, वाहतुकीचा वाढता खर्च, रोख रकमेची पूर्तता आणि किंमती यामुळे नॉन-मेट्रो शहरांमध्ये एटीएम चालवण्याचा खर्च वेगाने वाढत आहे.
