Pimpri-Chinchwad | पिंपरी-चिंचवड शहरात मागील तीन महिन्यांत 234 जणांनी आत्महत्या केली आहे. यात विशेषतः पुरुषांची संख्या अधिक असून, बदललेले सामाजिक-आर्थिक ताणतणाव आणि एकाकीपणाचे परिणाम आत्महत्येच्या वाढत्या प्रमाणामागे असल्याचे दिसून येते.

आर्थिक आणि कौटुंबिक कारणांनी आत्महत्या

पिंपरी पोलिस आयुक्तालयाच्या आकडेवारीनुसार, जानेवारी ते मार्च 2025 या कालावधीत शहरात 234 आत्महत्या झाल्या. त्यामध्ये तब्बल 170 आत्महत्यांमध्ये पुरुषांचा समावेश होता. पोलिसांनी दिलेल्या माहितीनुसार, अनेक आत्महत्यांचे कारण आर्थिक चणचण, कर्जबाजारीपणा, बेरोजगारी, व्यवसायातील अपयश आणि कौटुंबिक वाद असल्याचे समोर आले आहे.

विशेष म्हणजे, ओझोलॉजिक सायन्सच्या विश्लेषणानुसार, पुरुषांमध्ये कामाच्या तणावामुळे मानसिक आरोग्यावर मोठा परिणाम होत असून, त्यांनी आत्महत्या करण्याचा निर्णय अधिक घेतला आहे.

तज्ज्ञांच्या म्हणण्यानुसार, आत्महत्या करणाऱ्यांपैकी अनेक जणांनी एकाकीपणाची भावना अनुभवली. कुटुंबीय आणि समाजाकडून योग्य वेळेस आधार न मिळाल्यास, अशा व्यक्तींना अंधारात ढकलले जाते. युवकांमध्ये सोशल मीडिया, करिअरची धावपळ आणि नातेसंबंधातील अस्थिरता हे मुख्य कारणे असल्याचे सांगण्यात येते.

महिलांमध्येही चिंता वाढतेय

महिलांमध्ये झालेल्या आत्महत्यांमागे प्रेमभंग, शारीरिक व मानसिक छळ, घटस्फोट आणि कौटुंबिक अत्याचार यासारख्या कारणांचा समावेश आहे. अनेक महिलांनी वैवाहिक जीवनातील अपयशामुळे टोकाचे पाऊल उचलल्याचे दिसून आले आहे.

विशेषतः मानसिक तणावातून बाहेर पडण्यासाठी समुपदेशन, कुटुंबाचा भावनिक पाठिंबा आणि सामाजिक जागरूकता वाढवणे गरजेचे आहे. एकटेपणाशी सामना करण्यासाठी तरुणांसाठी समुपदेशन केंद्रे, हेल्पलाईन आणि समुदाय आधारित उपक्रमांची आवश्यकता आहे.