Sonali Bendre | बॉलिवूडची प्रसिद्ध अभिनेत्री सोनाली बेंद्रे अडचणीत सापडली आहे. जागेच्या खरेदी-विक्री व्यवहारात सोनाली आणि तिचा नवरा गोल्डी बेहलवर फसवणूक केल्याचा गंभीर आरोप करण्यात आला आहे. हे प्रकरण नेमकं काय आहे जाणून घेऊया.
वडगाव मावळ न्यायालयात दावा आणि तक्रारदाराचे आरोप
पुण्याजवळील वडगाव मावळ न्यायालयात (Vadgaon Maval Court) याप्रकरणी रीतसर खटला दाखल झाला आहे. चंद्रकांत बाळू शिंदे (Chandrakant Balu Shinde) यांनी मौजे-उकसान (Mauje-Uksan) परिसरातील सर्व्हे नंबर १२१/१ मधील ३० गुंठे जमिनीबाबत हा आक्षेप नोंदवला आहे. चंद्रकांत यांचे कायदेशीर प्रतिनिधी वकील वनराज शिंदे (Vanraj Shinde) यांनी दिलेल्या माहितीनुसार, ही विशिष्ट जमीन १ एप्रिल १९५७ पासून त्यांचे आजोबा केसू बाबाजी शिंदे (Kesu Babaji Shinde) यांच्या कसत होती आणि त्यावर त्यांचा कायदेशीर कुळ हक्क आहे. मात्र, मूळ जमीन मालकाने हा कुळाचा हक्क डावलून ही जागा सुरुवातीला बाळा शिंदे (Bala Shinde) नावाच्या इसमाला बेकायदेशीरपणे विकली.
त्यानंतर हाच कुळ हक्क लपवून ठेवत सदर जमीन पुढे या सेलिब्रिटी दांपत्याला परस्पर विकण्यात आली आहे. केवळ खरेदीखत बनवणे आणि सातबारा उताऱ्यावर नाव लागणे म्हणजे जमिनीची मूळ मालकी सिद्ध होत नाही, असा कायदेशीर मुद्दा वकील वनराज यांनी मांडला. तसेच, डिसेंबर २०२५ मध्ये खुद्द अभिनेत्री आणि तिच्या पतीने प्रत्यक्ष जागेवर येऊन चंद्रकांत आणि त्यांच्या वृद्ध आईसोबत हुज्जत घातल्याचा धक्कादायक आरोपही या दाव्यात करण्यात आला आहे.
बचाव पक्षाचा युक्तिवाद आणि प्रशासकीय निर्णय
दुसरीकडे, या सेलिब्रिटी दांपत्याचे वकील राजू शिंदे (Raju Shinde) यांनी हे सर्व आरोप तथ्यहीन असल्याचे सांगत फेटाळून लावले आहेत. त्यांच्या म्हणण्यानुसार, प्रत्यक्ष खरेदी खतामध्ये किंवा जमिनीच्या कागदपत्रांवर अभिनेत्रीचे नावच अस्तित्वात नाही, त्यामुळे तिचा या संपूर्ण प्रकरणाशी कोणताही थेट संबंध उरत नाही. तसेच, ८ जून १९६५ रोजी तत्कालीन तहसीलदारांनी एका स्पष्ट आदेशाद्वारे केसू शिंदे हे या जमिनीचे मूळ मालक किंवा कुळ नसल्याचे आधीच घोषित केले होते.
या जुन्या निर्णयाविरोधात तक्रारदारांनी आतापर्यंत तहसीलदार आणि उपविभागीय अधिकारी (SDO) यांसारख्या विविध महसूल स्तरांवर अनेकदा अपिले केली आहेत, परंतु प्रत्येक वेळी निकाल त्यांच्या विरोधातच लागला आहे. नुकतेच, ऑक्टोबर २०२५ मध्ये मावळच्या तहसीलदारांनी त्यांचे अपील पुन्हा एकदा फेटाळून लावले होते, ज्यानंतर हे प्रकरण आता उपविभागीय अधिकाऱ्यांसमोर प्रलंबित आहे. केवळ पैशांची मागणी करण्यासाठी आणि खंडणी उकळण्याच्या उद्देशानेच या प्रसिद्ध दांपत्याला वारंवार लक्ष्य केले जात असल्याचा ठाम प्रतिदावा बचाव पक्षाच्या वकिलांनी दूरध्वनीवरून संवाद साधताना केला आहे.
News Title: Sonali Bendre Faces Land Dispute Case In Pune
