Santosh Deshmukh | बीड (Beed) जिल्ह्यातील मस्साजोगचे सरपंच संतोष देशमुख (Santosh Deshmukh) यांच्या हत्या प्रकरणाच्या न्यायालयीन सुनावणीला सुरुवात झाली असून, यात आता वेगवेगळे आणि परस्परविरोधी तपशील समोर येत आहेत. दोन दिवसांपूर्वी बीड न्यायालयात विशेष सरकारी वकील उज्ज्वल निकम (Ujjwal Nikam) यांच्या उपस्थितीत पहिली सुनावणी पार पडली. यावेळी, निकम यांनी हा खून खंडणीसाठी (Extortion) झाल्याचा दावा केला, तर दुसरीकडे, आरोपींच्या कबुलीजबाबात वेगळाच हेतू समोर येत आहे.

खंडणीचा हेतू आणि सीआयडीचा तपास

विशेष सरकारी वकील उज्ज्वल निकम यांनी न्यायालयातील सुनावणीनंतर माध्यमांशी बोलताना सांगितले की, सीआयडी पोलिसांच्या (CID Police) तपासानुसार संतोष देशमुख यांची हत्या खंडणीसाठी करण्यात आली होती. आरोपींनी तशी कबुलीही दिली असल्याचे निकम यांनी स्पष्ट केले. त्यांनी न्यायालयातही आरोपींच्या गुन्हेगारी कृत्यांचा तपशील मांडला. या प्रकरणातील आठवा आरोपी कृष्णा आंधळे (Krishna Andhale) हा अद्याप फरार असून पोलीस त्याचा शोध घेत आहेत.

निकम यांच्या युक्तिवादानुसार, खंडणीच्या उद्देशानेच हे नियोजनबद्ध हत्याकांड घडवण्यात आले. सीआयडीने केलेल्या तपासात हा निष्कर्ष काढण्यात आला आहे आणि आरोपींच्या कबुलीजबाबातूनही याला दुजोरा मिळत असल्याचे त्यांचे म्हणणे आहे. त्यामुळे, या प्रकरणाचा मुख्य हेतू खंडणी वसुली हाच असल्याचे सरकारी पक्षाचे म्हणणे आहे.

बदल्याची थिअरी

मात्र, याच प्रकरणातील आरोपी जयराम चाटे (Jayram Chatte) आणि महेश केदार (Mahesh Kedar) यांनी पोलिसांना दिलेल्या कथित कबुलीजबाबात खंडणीचा कोणताही उल्लेख केलेला नाही. त्यांच्या जबाबातून एक पूर्णपणे वेगळीच ‘थिअरी’ समोर आली आहे. या दोघांच्या म्हणण्यानुसार, सुदर्शन घुले (Sudarshan Ghule) याला झालेल्या मारहाणीचा आणि अपमानाचा बदला घेण्यासाठी संतोष देशमुख यांना धडा शिकवायचा होता. फरार आरोपी कृष्णा आंधळे यानेच आपल्याला हे सांगितले होते, असे चाटे आणि केदार यांनी म्हटले आहे.

या जबाबांमध्ये सुग्रीव कराड (Sugriv Karad) नावाच्या व्यक्तीचाही उल्लेख आहे. चाटे आणि केदार यांच्या म्हणण्यानुसार, कृष्णा आंधळेने त्यांना सांगितले होते की, ‘सुग्रीव कराडच्या सांगण्यावरूनच सरपंच संतोष देशमुख आणि मस्साजोगच्या ग्रामस्थांनी सुदर्शन घुलेला मारहाण केली होती. यामुळे सुदर्शन घुले आणि वाल्मिक अण्णा (Walmik Anna) यांची बदनामी झाली असून, त्याचा बदला घ्यायचा आहे.’ असे सांगून कृष्णा आंधळेने चाटे आणि केदारला आपल्यासोबत घेतल्याचे जबाबात म्हटले आहे. सुग्रीव कराड हा केज (Kej) येथील रहिवासी असून, स्थानिक राजकारणात सक्रिय आहे. त्याने आमदार धनंजय मुंडे (MLA Dhananjay Munde) आणि वाल्मिक कराड यांच्यासोबत काम केले असून, सध्या तो खासदार बजरंग सोनवणे (MP Bajrang Sonawane) यांच्यासोबत असल्याचे समजते. या नव्या माहितीमुळे हत्येच्या हेतूबाबत संभ्रम निर्माण झाला असून, पोलीस आणि न्यायालयीन पातळीवर दोन्ही बाजू तपासल्या जात आहेत.