Samruddhi Mahamarg | नागपूर ते मुंबई (Nagpur-Mumbai) दरम्यान जलद प्रवासासाठी उभारण्यात आलेल्या समृद्धी महामार्गावर (Samruddhi Mahamarg) एक गंभीर घटना घडली आहे. बुलढाणा (Buldhana) जिल्ह्यातील सिंदखेडराजा तालुक्यात एका पुलाच्या जॉईंटमधील लोखंडी रॉड तुटल्याने, त्यावरून जाणाऱ्या एकामागोमाग एक अशा नऊ वाहनांचे टायर फुटले. ही घटना मंगळवारी (१ एप्रिल) रात्री घडली असून, सुदैवाने यात कोणतीही जीवितहानी झाली नाही. मात्र या घटनेने महामार्गाच्या सुरक्षिततेवर प्रश्नचिन्ह निर्माण केले आहे.
पुलाचा रॉड तुटल्याने टायर फुटले
मिळालेल्या माहितीनुसार, ही घटना समृद्धी महामार्गावर सिंदखेडराजा तालुक्यातील राहेरी बु. (Raheri Bk) गावाजवळ असलेल्या खडकपूर्णा नदीवरील (Khadakpurna River) पुलावर घडली. १ एप्रिल रोजी रात्री सुमारे ९ वाजण्याच्या सुमारास, या पुलाच्या जॉइंटमधील बेअरिंग गॅपजवळ असलेला एक लोखंडी रॉड (Iron Rod) तुटून रस्त्यावर आला. त्यानंतर, या तुटलेल्या रॉडवरून वेगात जाणाऱ्या वाहनांचे टायर एकामागोमाग एक फुटण्यास सुरुवात झाली. एकूण नऊ वाहनांना याचा फटका बसला.
अचानक टायर फुटल्याने वाहने अनियंत्रित होण्याची भीती होती. मात्र, सुदैवाने काही वाहनांमधील एअरबॅग्स (Airbags) वेळीच उघडल्याने आणि काही चालकांनी प्रसंगावधान राखून वाहनांवर नियंत्रण मिळवल्याने मोठी जीवितहानी किंवा अपघात टळला. या घटनेनंतर एका जागरूक वाहनचालकाने तात्काळ महामार्गाच्या मध्यवर्ती नियंत्रण कक्षाला (Central Control Room) या धोकादायक परिस्थितीची माहिती दिली, ज्यामुळे पुढील अनर्थ टाळण्यास मदत झाली.
महामार्ग खुला होण्यापूर्वीच पडल्या भेगा?
एकीकडे ही टायर फुटण्याची घटना घडली असताना, दुसरीकडे समृद्धी महामार्गाच्या अद्याप वाहतुकीसाठी खुला न झालेल्या भागावर भेगा (Cracks) पडल्याचेही वृत्त समोर आले आहे. मुंबईजवळचा आमने ते इगतपुरी (Amne to Igatpuri) दरम्यानचा सुमारे ७६ किलोमीटर लांबीचा शेवटचा टप्पा येत्या महिनाभरात वाहतुकीसाठी खुला होणे अपेक्षित आहे. मात्र, हा मार्ग खुला होण्यापूर्वीच आमने ते कसारा (Kasara) आणि पुढे इगतपुरी दरम्यान सिमेंट काँक्रीटच्या रस्त्याला काही ठिकाणी भेगा आढळून आल्या आहेत.
नागपूर ते मुंबई असा एकूण ७०१ किलोमीटरचा हा महत्त्वाकांक्षी महामार्ग महाराष्ट्र राज्य रस्ते विकास महामंडळाने (MSRDC) उभारला आहे. त्यातील नागपूर ते इगतपुरी (६२५ किमी) हा टप्पा वाहतुकीसाठी खुला आहे. मात्र, शेवटचा टप्पा सुरू होण्यापूर्वीच त्यावर भेगा दिसू लागल्याने कामाच्या दर्जाबाबत प्रश्न उपस्थित होत असून, एमएसआरडीसीवर टीका होत आहे. या दोन्ही घटनांमुळे समृद्धी महामार्गावरील सुरक्षितता आणि बांधकामाचा दर्जा यावर गंभीर चर्चा सुरू झाली आहे.
Title : Samruddhi Mahamarg Incident Bridge Rod Breaks Tyre Bursts
