Pune News l पुणे शहरातील रस्त्यांवर पोलिसांची उपस्थिती वाढवून नागरिकांना तातडीने मदत मिळावी यासाठी पुणे पोलिसांनी (Pune Police) एक महत्त्वाकांक्षी पाऊल उचलले आहे. ‘कॉप २४’ (Cop 24) या नावाने एक नवीन उपक्रम लवकरच सुरू होत असून, या उपक्रमाअंतर्गत तब्बल ७२६ पोलीस कर्मचारी २४ तास गस्त घालणार आहेत. या कर्मचाऱ्यांचे विशेष प्रशिक्षण सध्या सुरू आहे.
शहरात यापूर्वी ‘बीट मार्शल’ (Beat Marshal) ही संकल्पना राबवली जात होती. प्रत्येक पोलिस ठाण्याच्या हद्दीत दोन-दोन कर्मचारी दोन सत्रांत गस्त घालत असत. रस्त्यांवरील गुन्हेगारीला आळा घालणे, दुर्घटना घडल्यास तातडीने मदत करणे आणि समाजात सुरक्षेची भावना निर्माण करणे या उद्देशाने ‘बीट मार्शल’ योजना सुरू होती. मात्र, कालांतराने ही योजना काहीशी ‘प्रभावहीन’ ठरत असल्याचे निदर्शनास आल्याने पोलिस आयुक्त अमितेशकुमार यांनी ‘कॉप २४’ हा नवा उपक्रम सुरू करण्याचा निर्णय घेतला.
‘कॉप २४’ची वैशिष्ट्ये :
‘कॉप २४’ हा उपक्रम ‘बीट मार्शल’ योजनेपेक्षा अधिक व्यापक आणि प्रभावी असणार आहे. या उपक्रमाची खास वैशिष्ट्ये म्हणजे, नियुक्त केलेले ७२६ पोलिस कर्मचारी थेट गुन्हे शाखेच्या नियंत्रणाखाली काम करणार आहेत. त्यांना स्थानिक पोलिस ठाण्यातील दैनंदिन कामांचा भार दिला जाणार नाही. त्यामुळे ते पूर्णवेळ गस्तीवर लक्ष केंद्रित करू शकतील.
या उपक्रमामुळे शहरातील रस्त्यांवर २४ तास पोलिसांची नजर असणार आहे. त्यामुळे गुन्हेगारी प्रवृत्तींना नक्कीच चाप बसेल. तसेच, अपघात किंवा इतर आपत्कालीन परिस्थितीत नागरिकांना जलद गतीने मदत मिळेल. या उपक्रमामुळे पुणेकर नागरिकांमध्ये सुरक्षिततेची भावना अधिक दृढ होईल, असा विश्वास व्यक्त होत आहे.
Pune News l प्रशिक्षण आणि अंमलबजावणी :
‘कॉप २४’साठी निवडलेल्या ७२६ पोलिस कर्मचाऱ्यांना विशेष प्रशिक्षण दिले जात आहे. यामध्ये गस्त घालण्याच्या पद्धती, संशयित व्यक्तींची ओळख, नागरिकांशी संवाद, प्रथमोपचार, कायदेशीर बाबी अशा विविध विषयांचा समावेश आहे. प्रशिक्षण पूर्ण होताच हे कर्मचारी शहराच्या विविध भागांत तैनात केले जातील.
पोलीस आयुक्त अमितेशकुमार (Amitesh Kumar) यांचा हा महत्त्वाकांक्षी उपक्रम आहे. ‘कॉप २४’ हा उपक्रम पूर्ण क्षमतेने कार्यान्वित झाल्यानंतर शहरातील कायदा आणि सुव्यवस्थेत नक्कीच सकारात्मक बदल दिसून येतील. यामुळे पुणे शहर अधिक सुरक्षित होईल आणि नागरिकांना निर्भयपणे वावरता येईल अशी आशा आहे.
