New Ocean l चार वर्षांपूर्वी जगाला कोरोना (Corona) महामारीने (Pandemic) ग्रासले होते. आता शास्त्रज्ञांनी (Scientists) केलेल्या एका नवीन संशोधनानुसार, येत्या काही वर्षांत जगावर आणखी एक मोठे संकट येऊ शकते, ज्यामुळे मानवी जीवन पूर्णपणे बदलून जाईल.
आफ्रिका खंडात फूट :
शास्त्रज्ञांनी केलेल्या संशोधनात असे दिसून आले आहे की, आफ्रिका खंड (African Continent) दोन भागांमध्ये विभागला जाणार आहे आणि यामुळे पृथ्वीवर (Earth) एक नवीन महासागर (Ocean) तयार होईल. शास्त्रज्ञांच्या या दाव्यामुळे जगभरात चर्चा सुरू झाली आहे. आफ्रिका खंड दोन भागांत विभागला गेल्यास त्याचे नेमके काय परिणाम होतील, याबाबत विविध तर्कवितर्क लढवले जात आहेत. पृथ्वीच्या आतमध्ये नेहमीच काही भौगोलिक हालचाली (Geological Movements) सुरू असतात. या हालचाली मानवासाठी संथ वाटू शकतात, पण प्रत्यक्षात त्या वेगाने घडत असतात.
New Ocean l नवीन महासागराची निर्मिती ;
सध्या आफ्रिका खंडात अशीच एक भौगोलिक घटना घडताना दिसत आहे. शास्त्रज्ञांनी दिलेल्या माहितीनुसार, आफ्रिकेच्या पूर्व भागात एक मोठी दरी तयार झाली आहे आणि ती हळूहळू वाढत आहे. यामुळे भविष्यात आफ्रिका खंड दोन भागांमध्ये विभागला जाईल, अशी शक्यता वर्तवण्यात आली आहे. यामुळे केवळ आफ्रिका खंड दोन भागांत विभागला जाणार नाही, तर एका नवीन महासागराची निर्मिती होईल आणि पृथ्वीचा मोठा भाग पाण्याखाली जाण्याची शक्यता आहे.
टेक्टॉनिक प्लेट्स कारणीभूत :
आफ्रिका खंड दोन भागांत विभागला जाण्यामागे टेक्टॉनिक प्लेट्सच्या (Tectonic Plates) हालचाली कारणीभूत आहेत, असे शास्त्रज्ञांचे म्हणणे आहे. वैज्ञानिकांना असे आढळून आले आहे की, जमिनीखालील बदल अपेक्षेपेक्षा जास्त वेगाने होत आहेत, ज्यामुळे पृथ्वीच्या नकाशामध्ये मोठा बदल होऊ शकतो.
शास्त्रज्ञांच्या निरीक्षणानुसार, आफ्रिकन आणि सोमाली टेक्टॉनिक प्लेट्स दरवर्षी सुमारे 0.8 सेंटीमीटरच्या वेगाने एकमेकांपासून दूर जात आहेत. या हालचालींमुळे मोठ्या प्रमाणावर भेगा पडत आहेत, ज्यामुळे भूभाग कमकुवत होत आहे. विशेषतः इथिओपियामधील (Ethiopia) अफार (Afar) प्रदेशात सुमारे 60 किलोमीटर लांबीची आणि 10 मीटर खोलीपर्यंत पोहोचणारी मोठी भेग आढळून आली आहे.
प्रक्रिया वेगाने :
संशोधकांचे म्हणणे आहे की, ही प्रक्रिया पूर्वी लाखो वर्षे चालेल, असा अंदाज होता, पण आता ती केवळ 10 लाख वर्षे किंवा त्याहून कमी कालावधीत पूर्ण होऊ शकते. पूर्व आफ्रिकन रिफ्ट सिस्टीम (East African Rift System) ही मोझांबिकपासून (Mozambique) तांबड्या समुद्रापर्यंत (Red Sea) पसरलेली असून, ती पृथ्वीच्या भूगर्भीय रचनेत मोठा बदल घडवून आणत आहे.
जेव्हा आफ्रिका खंड पूर्णपणे तुटेल, तेव्हा त्या प्रदेशात नवीन महासागर निर्माण होईल. यामुळे आफ्रिकेचा नकाशा कायमचा बदलेल आणि अनेक देशांचे भौगोलिक स्थानही बदलेल. याच प्रकारची प्रक्रिया लाखो वर्षांपूर्वी अटलांटिक महासागराच्या (Atlantic Ocean) निर्मितीसाठी कारणीभूत होती. 2005 मध्ये इथिओपियामध्ये झालेल्या एका मोठ्या भूगर्भीय घटनेने संशोधकांना या प्रक्रियेबाबत अधिक ठोस पुरावे मिळवून दिले.
काही आठवड्यांतच 420 हून अधिक भूकंप (Earthquake) झाले, ज्यामुळे जमिनीमध्ये मोठ्या प्रमाणावर भेगा पडल्या आणि भूभाग विभागला गेला. शास्त्रज्ञांच्या मते, टेक्टॉनिक प्लेट्सचे विभाजन आणि हालचाली नेहमीच संथ नसतात. काहीवेळा या हालचाली अचानक वेगाने होऊ शकतात आणि त्याचा परिणाम मानवी जीवनावर मोठ्या प्रमाणावर होऊ शकतो.
