Ketan Agrawal Case | पुण्यातील केतन अग्रवाल (Ketan Agrawal) हत्या प्रकरणात तपासादरम्यान नवीन माहिती समोर येत असल्याचा दावा पोलिसांनी केला आहे. मुख्य आरोपी सिया गोयल (Siya Goyal) आणि चेतन चौधरी (Chetan Chaudhary) यांच्या मोबाईलमधील डेटा, चॅट्स, वेब हिस्ट्री आणि सीसीटीव्ही फुटेजच्या आधारे अनेक बाबी तपासा दरम्यान समोर आल्या आहेत. या प्रकरणात दोन्ही आरोपींना 29 जुलैपर्यंत न्यायालयीन कोठडी सुनावण्यात आली आहे.
मोबाईल डेटा आणि सीसीटीव्हीतून नव्या दाव्यांची माहिती :
केतन अग्रवाल हत्या प्रकरणातील प्रमुख आरोपी सिया गोयल आणि चेतन चौधरी यांना गुरुवारी व्हिडिओ कॉन्फरन्सद्वारे वडगाव (Vadgaon) न्यायालयात हजर करण्यात आले. सुनावणीनंतर न्यायालयाने दोघांनाही 29 जुलैपर्यंत न्यायालयीन कोठडीत ठेवण्याचे आदेश दिले. दरम्यान, तपासादरम्यान दोघांच्या मोबाईलमधून काही महत्त्वाची माहिती समोर आल्याचा दावा पोलिसांनी केला आहे.
पोलिसांच्या माहितीनुसार, फेब्रुवारी महिन्यात केतन अग्रवालसोबत लग्न ठरल्यानंतरही सिया गोयल आणि चेतन चौधरी अनेक हॉटेलमध्ये भेटत असल्याचे पुरावे तपास यंत्रणेला मिळाले आहेत. या संदर्भात चार ते पाच हॉटेलमधील सीसीटीव्ही फुटेज पोलिसांनी जप्त केले आहेत. तसेच सिया गोयलच्या दुसऱ्या मोबाईलमध्ये अनेक व्हिडिओ आणि चॅट्स आढळल्याचे सांगण्यात आले आहे. तपासात सिया चार ते पाच तरुणांशी सातत्याने चॅट करत असल्याचे, तर चेतन चौधरीचेही चार ते पाच तरुणींशी संबंध असल्याचे पुरावे मिळाल्याचा दावा पोलिसांनी केला आहे. दोघेही विविध व्यक्तींच्या सतत संपर्कात होते आणि अनेक हॉटेलमध्ये त्यांची भेट झाल्याचे समोर आल्याने या प्रकरणाशी संबंधित इतर कोणतेही बेकायदेशीर कृत्य झाले का, याचाही तपास सुरू आहे.
Ketan Agrawal Case | वेब हिस्ट्री, जपानी व्हिडिओ आणि तपासाचा पुढील टप्पा :
तपासादरम्यान आरोपींच्या मोबाईलमधील डेटा आणि डिलीट करण्यात आलेल्या वेब हिस्ट्रीची तपासणी करण्यात आली. त्यातून केतन अग्रवालच्या मृत्यूला अपघाताचे स्वरूप देण्याचा कट रचल्याचा दावा पोलिसांनी केला आहे. याशिवाय लोहगड (Lohagad) येथील घटनेपूर्वी केतनला ‘स्लो पॉयझन’ देण्याचा कट आखल्याचाही तपासात उल्लेख करण्यात आला आहे.
तसेच केतनच्या हत्येनंतर पोलिसांची दिशाभूल करण्यासाठी आरोपींनी जपानी पॉडकास्ट आणि व्हिडिओ पाहिल्याचा दावाही तपासातून समोर आला आहे. चौकशीदरम्यान शांत राहणे, तपास अधिकाऱ्यांना दिशाभूल करणारी उत्तरे देणे यासंदर्भातील व्हिडिओ त्यांनी पाहिल्याची माहिती पोलिसांनी दिली आहे. या सर्व बाबींची पडताळणी सुरू असून तपास पूर्ण झाल्यानंतर अधिकृत आरोपपत्र (Chargesheet) न्यायालयात दाखल करण्यात येणार आहे. तोपर्यंत कायदेशीर प्रक्रियेनुसार न्यायालयाकडून आरोपींच्या न्यायालयीन कोठडीचा कालावधी प्रत्येक 14 दिवसांनी वाढवला जाऊ शकतो.
