School Van Train Accident | एक अत्यंत हृदयद्रावक आणि धक्कादायक बातमी समोर आली आहे. एका भरधाव पॅसेंजर ट्रेनने शाळकरी विद्यार्थ्यांना घेऊन जाणाऱ्या व्हॅनला जोरदार धडक दिली. या भीषण अपघातात व्हॅनचा पार चक्काचूर झाला असून, दोन निष्पाप विद्यार्थ्यांचा जागीच दुर्दैवी मृत्यू झाला आहे. तर या दुर्घटनेत ५ जण गंभीररित्या जखमी झाले असून त्यांच्यावर रुग्णालयात उपचार सुरू आहेत.
ही भीषण दुर्घटना मुर्शिदाबादच्या बहरमपूर पोलीस ठाण्याच्या (Berhampore Police Station) हद्दीत असलेल्या कर्णसुबर्ण आणि गोविंदपूर रेल्वे स्थानकांदरम्यानच्या रेल्वे क्रॉसिंगवर घडली. या घटनेमुळे संपूर्ण परिसरात एकच खळबळ उडाली आहे.
फाटक उघडे राहिल्याने काळ बनून आली पॅसेंजर ट्रेन
प्रत्यक्षदर्शींनी आणि स्थानिक नागरिकांनी दिलेल्या माहितीनुसार, हा अपघात एका खासगी शाळेच्या व्हॅनसोबत झाला. ही व्हॅन नेहमीप्रमाणे सकाळी विद्यार्थ्यांना घेऊन शाळेच्या दिशेने निघाली होती. रेल्वे क्रॉसिंगवर पोहोचल्यानंतर तिथले फाटक उघडे असल्याचे पाहून चालकाने व्हॅन रेल्वे ट्रॅकवरून पुढे नेण्याचा प्रयत्न केला. मात्र, त्याच वेळी तिथून अत्यंत वेगाने जाणाऱ्या निमतिता-काटोया पॅसेंजर ट्रेनने (Nimtita-Katwa Passenger) स्कूल व्हॅनला भीषण धडक दिली.
ट्रेनची धडक इतकी जोरदार होती की व्हॅन उलटून थेट बाजूला जाऊन कोसळली. अपघाताच्या वेळी या स्कूल व्हॅनमध्ये चालकासह एकूण ८ जण स्वार होते. धडक बसताच व्हॅनमधील सर्व प्रवासी बाहेर फेकले गेले.
गेटमॅनचा हलगर्जीपणा; एका बाजूचे फाटक होते उघडे
या अपघातामागे रेल्वे कर्मचाऱ्याचा मोठा हलगर्जीपणा समोर येत असल्याचा दावा प्रत्यक्षदर्शींनी केला आहे. मिळालेल्या माहितीनुसार, रेल्वे क्रॉसिंगच्या केवळ एकाच बाजूचे फाटक बंद करण्यात आले होते, तर दुसऱ्या बाजूचे फाटक पूर्णपणे उघडे होते. रेल्वे क्रॉसिंगवर तैनात असलेल्या गेटमॅनने वेळेत दोन्ही बाजूंची फाटके बंद न केल्यामुळेच व्हॅन चालकाला ट्रेन येत असल्याचा अंदाज आला नाही आणि हा भीषण अपघात घडला.
अपघात घडताच आजूबाजूला असलेल्या स्थानिक नागरिकांनी तातडीने घटनास्थळाकडे धाव घेतली आणि मदतकार्य सुरू केले. त्यांनी जखमी अवस्थेतील विद्यार्थ्यांना तात्काळ कर्णसुबर्ण ब्लॉक रुग्णालयात दाखल केले, मात्र रुग्णालयात पोहोचण्यापूर्वीच दोन विद्यार्थ्यांचा मृत्यू झाला होता.
रेल्वे प्रशासनाकडून चौकशीचे आदेश; दोषींवर कारवाईची मागणी
रुग्णालयात दाखल केलेल्या इतर जखमी विद्यार्थ्यांना प्राथमिक उपचार दिल्यानंतर पुढील तातडीच्या उपचारांसाठी मुर्शिदाबाद मेडिकल कॉलेज आणि रुग्णालयात (Murshidabad Medical College and Hospital) हलवण्यात आले आहे, जिथे त्यांची प्रकृती चिंताजनक असल्याचे समजते.
या भीषण अपघाताची माहिती मिळताच स्थानिक पोलीस प्रशासन आणि रेल्वेचे वरिष्ठ अधिकारी तातडीने घटनास्थळी दाखल झाले. रेल्वे प्रशासनाने या संपूर्ण प्रकरणाची गंभीर दखल घेतली असून, अपघाताच्या कारणांचा शोध घेण्यासाठी उच्चस्तरीय चौकशीचे आदेश जारी केले आहेत. दोन शाळकरी मुलांच्या अकाली मृत्यूमुळे संबंधित शाळेसह संपूर्ण जिल्ह्यावर शोककळा पसरली असून, संतप्त नातेवाईकांनी आणि नागरिकांनी हलगर्जीपणा करणाऱ्या दोषी रेल्वे कर्मचाऱ्यांवर तात्काळ कडक कायदेशीर कारवाई करण्याची मागणी केली आहे.
News Title: School Van Train Accident Murshidabad West Bengal
