Kidney Damage | किडनी हे शरीरातील विषारी पदार्थ बाहेर टाकण्याचं काम करणारे महत्त्वाचे अवयव असून त्यांच्या कार्यक्षमतेत बिघाड झाल्यास आरोग्यावर गंभीर परिणाम होऊ शकतो. सकाळी उठल्यानंतर शरीर काही संकेत देत असते, जे दुर्लक्षित केल्यास किडनी समस्येचं (Kidney Damage) रुप घेऊ शकतात. अशा लक्षणांकडे वेळीच लक्ष देणं आवश्यक आहे.
किडनी निकामी होण्यामागची कारणं
किडनी शरीरातील मीठ, पाण्याचं प्रमाण, पीएच संतुलन यासह अनेक आवश्यक गोष्टी नियंत्रित करत असतात. मात्र सध्याच्या धकाधकीच्या जीवनशैलीमुळे, असंतुलित आहार, मधुमेह, उच्च रक्तदाब आणि आनुवंशिक कारणांमुळे किडनीचे कार्य बिघडू शकते. अशा परिस्थितीत विषारी घटक शरीरात जमा होऊ लागतात, ज्यामुळे इतरही आजार उद्भवू शकतात.
किडनी निकामी होण्याच्या सुरुवातीच्या टप्प्यावर लक्षणं सौम्य स्वरूपाची असतात आणि त्यामुळे ती ओळखणं कठीण जातं. हाडं कमजोर होणं, मेंदू आणि मज्जासंस्थेवर परिणाम होणं, अॅनिमिया व कुपोषणसारख्या समस्या उद्भवू शकतात. परिस्थिती गंभीर झाल्यास डायलिसिस किंवा किडनी ट्रान्सप्लांटची वेळ येते. म्हणूनच अशा सुरुवातीच्या इशाऱ्यांकडे दुर्लक्ष करू नये.
सकाळी दिसणारी किडनी समस्यांची इशारादायक 5 लक्षणं
सकाळी उठल्यावर चेहरा आणि पाय सुजलेले वाटत असतील, तर तो किडनी बिघाडाचा पहिला इशारा मानला जातो. किडनीमुळे शरीरात साचलेलं अतिरिक्त पाणी सूज निर्माण करतं. दुसरं लक्षण म्हणजे लघवीत फेस किंवा बुडबुडे दिसणं – याला प्रोटिन्युरिया म्हणतात, आणि ते किडनी रक्तातला प्रोटीन गाळण्यात अयशस्वी होत असल्याचं दर्शवतं.
तिसरं लक्षण म्हणजे अतिशय कोरडी त्वचा आणि सततची खाज. जेव्हा किडनी काम करणं बंद करतं, तेव्हा घामग्रंथींवर परिणाम होतो आणि शरीरातील घाण साचते, ज्यामुळे अशा लक्षणांची निर्मिती होते. चौथं लक्षण म्हणजे ब्रेन फॉग – लक्ष केंद्रित न होणं, थकवा, मेंदू सुस्त वाटणं. हे रक्तातील विषारी पदार्थ मेंदूपर्यंत पोहोचल्यामुळे घडतं.
पाचवं आणि अंतिम लक्षण म्हणजे सकाळचा दुर्गंधीयुक्त श्वास. किडनी रक्तातील युरिया योग्यरित्या गाळू शकत नसल्यामुळे युरेमिक ब्रीद निर्माण होतो. जर सकाळी श्वासात सतत दुर्गंधी येत असेल, तर तात्काळ वैद्यकीय तपासणी गरजेची आहे.
