MHADA Recruitment | नोकरीच्या शोधात असलेल्या उमेदवारांसाठी चांगली संधी उपलब्ध झाली आहे. महाराष्ट्र गृहनिर्माण व क्षेत्रविकास प्राधिकरण (MHADA) अंतर्गत नागपूर मंडळामार्फत काही पदांसाठी भरती प्रक्रिया सुरू करण्यात आली आहे. पात्र उमेदवारांकडून ऑफलाईन अर्ज मागवण्यात येत असून निवड झालेल्या उमेदवारांना दरमहा सुमारे 45 हजार ते 50 हजार रुपयांपर्यंत मानधन मिळू शकते.
नागपूर मंडळांतर्गत तीन पदांसाठी संधी
नागपूर गृहनिर्माण व क्षेत्रविकास मंडळ (Nagpur Housing and Area Development Board) अंतर्गत ही भरती केली जात आहे. या प्रक्रियेद्वारे एकूण तीन जागा भरण्यात येणार असून नियुक्ती पूर्णपणे तात्पुरत्या स्वरूपात कंत्राटी पद्धतीने केली जाणार आहे. ही पदे प्रधानमंत्री आवास योजना (Pradhan Mantri Awas Yojana) शहरी 2.0 अंतर्गत मंजूर झालेल्या प्रकल्पांच्या अंमलबजावणीसाठी तयार करण्यात आली आहेत.
चंद्रपूर (Chandrapur) शहरातील मंजूर AHP प्रकल्पासाठी शहरस्तरीय तांत्रिक कक्षात स्थापत्य अभियंता तज्ञ (Civil Engineer) एक पद आणि सामाजिक विकास तज्ञ (Social Development Specialist) एक पद भरण्यात येणार आहे. याशिवाय भंडारा (Bhandara) शहरातील AHP प्रकल्पासाठी शहरस्तरीय तांत्रिक कक्षात सामाजिक विकास तज्ञाचे एक पद भरले जाणार आहे. अशा प्रकारे एकूण तीन पदांसाठी भरती प्रक्रिया राबवली जात आहे.
MHADA Recruitment | शैक्षणिक पात्रता आणि अर्ज प्रक्रिया :
स्थापत्य अभियंता तज्ञ पदासाठी मान्यताप्राप्त विद्यापीठातून स्थापत्य अभियांत्रिकी (Civil Engineering) विषयात पदवी किंवा पदविका असणे आवश्यक आहे. सामाजिक विकास तज्ञ पदासाठी समाजशास्त्र (Sociology) किंवा सामाजिक कार्य (MSW) या विषयात पदव्युत्तर पदवी आणि संबंधित क्षेत्रातील अनुभव अपेक्षित आहे.
या भरतीसाठी अर्ज करण्याची प्रक्रिया ऑफलाईन ठेवण्यात आली आहे. पात्र उमेदवारांना 6 एप्रिल 2026 पासून अर्ज करता येणार असून 15 एप्रिल 2026 रोजी सायंकाळी 5 वाजेपर्यंत अर्ज सादर करण्याची अंतिम मुदत निश्चित करण्यात आली आहे. अर्ज नागपूरमधील आमदार निवासाजवळील सिव्हिल लाईन्स परिसरातील म्हाडा कार्यालयात उपलब्ध असलेल्या विहित नमुन्यात भरून सादर करावा लागेल. (MHADA Recruitment)
उमेदवारांनी अर्जासोबत शैक्षणिक पात्रतेची कागदपत्रे, अनुभव प्रमाणपत्रे आणि आवश्यक कागदपत्रांची जोड देणे आवश्यक आहे. अर्जांची छाननी झाल्यानंतर पात्र आणि अनुभव असलेल्या उमेदवारांनाच पुढील मुलाखत प्रक्रियेसाठी बोलावले जाईल. ही नियुक्ती पूर्णपणे कंत्राटी स्वरूपाची असून 11 महिन्यांच्या कालावधीसाठी लागू राहणार आहे. तसेच या भरती प्रक्रियेत आवश्यकतेनुसार बदल किंवा रद्द करण्याचा अधिकार नागपूर मंडळाकडे राखीव ठेवण्यात आला आहे.
