Manisha Bidve | कळंब (Kalamb) येथील मनिषा बिडवे (Manisha Bidve) हत्या प्रकरणात अटक करण्यात आलेल्या मुख्य आरोपी आणि तिच्या ड्रायव्हरने, रामेश्वर भोसले (Rameshwar Bhosale) याने, पोलिसांसमोर गुन्ह्याची धक्कादायक कबुली दिली आहे. मनिषा आपल्याला आक्षेपार्ह फोटो आणि व्हिडिओद्वारे ब्लॅकमेल करत होती व शारीरिक-मानसिक छळ करत होती, त्याला कंटाळून तिची हत्या केल्याचे त्याने म्हटले आहे. विशेष म्हणजे, हत्येनंतर तो दोन दिवस तिच्या मृतदेहासोबत एकाच खोलीत राहिला होता. पोलिसांनी या हत्येचा संबंध संतोष देशमुख (Santosh Deshmukh) प्रकरणाशी नसल्याचे स्पष्ट केले आहे.

आरोपीचा धक्कादायक कबुलीजबाब

कळंब पोलिसांनी मनिषा बिडवे हत्या प्रकरणात दोन आरोपींना अटक केली आहे. यातील मुख्य आरोपी रामेश्वर भोसले याने दिलेल्या कबुलीजबाबानुसार, मयत मनिषा बिडवे ही त्याच्याकडे असलेल्या काही आक्षेपार्ह व्हिडिओ आणि फोटोंच्या आधारे त्याला सतत ब्लॅकमेल (Blackmail) करत होती आणि त्याचा मानसिक व शारीरिक छळ (Torture) करत होती. ती कधीकधी आपण विवाहित असल्याचे फोटोही दाखवत असे. घटनेच्या दिवशी, २२ मार्च रोजी, मनिषाने रामेश्वरला उठाबशाही काढायला लावली होती.

या अपमानास्पद वागणुकीमुळे संतापलेल्या रामेश्वरने रागाच्या भरात तिच्या डोक्यात हातोड्याने (Hammer) प्रहार केला. डोक्याला गंभीर जखम झाल्याने आणि रक्तस्त्राव सुरू झाल्याने मनीषाने ‘मला खूप लागलंय, दवाखान्यात घेऊन चल’ अशी विनवणी केली. परंतु, रामेश्वरने तिला तिथेच सोडून दिले, ज्यामुळे प्रचंड रक्तस्त्रावामुळे तिचा मृत्यू झाला. यानंतर दोन दिवस रामेश्वर त्याच खोलीत मृतदेहाशेजारी राहिला आणि तिथेच त्याने जेवणही केले. तिसऱ्या दिवशी मृतदेहाला दुर्गंधी येऊ लागल्याने तो तिची गाडी घेऊन पसार झाला. त्याने केज (Kej) येथील मित्र उस्मानला (Usman) बोलावून मृतदेह दाखवला आणि नंतर मनिषाचा मोबाईल घेऊन तो फरार झाला. पैशांची गरज असल्याने नंतर त्याने तो मोबाईल विकल्याची कबुलीही दिली आहे. पोलीस आता तो मोबाईल जप्त करण्याचा प्रयत्न करत आहेत.

Manisha Bidve ची कोट्यवधींची माया

मनिषा बिडवे ही अनेक वेगवेगळ्या नावांनी वावरत होती आणि अनेकांना तक्रार देण्याची धमकी देऊन ब्लॅकमेल करून तिने लाखो रुपये उकळले होते, अशी माहिती समोर येत आहे. याच पैशातून तिने कळंबमध्ये सुमारे पाऊण कोटी रुपये किमतीचे दोन रो-हाऊस (Row Houses) आणि आडस येथे एक शॉपिंग कॉम्प्लेक्स (Shopping Complex) घेतल्याची माहिती आहे.

मागील काही दिवसांपासून मनिषा बिडवे प्रकरणाचा संबंध मस्साजोगचे सरपंच संतोष देशमुख हत्या प्रकरणाशी जोडला जात होता. संतोष देशमुख यांना खोट्या गुन्ह्यात अडकवण्यासाठी तिचा वापर केला जाणार होता, असा दावा सामाजिक कार्यकर्त्या अंजली दमानिया (Anjali Damania) यांनी केला होता. मात्र, रामेश्वर भोसलेच्या कबुलीजबाबामुळे पोलिसांनी हे स्पष्ट केले आहे की, मनिषा बिडवेची हत्या वैयक्तिक कारणातून (ब्लॅकमेलिंग/छळ) झाली असून, तिचा संतोष देशमुख हत्या प्रकरणाशी सध्यातरी कोणताही संबंध आढळून आलेला नाही. काही लोकांनी खातरजमा न करता दोन्ही प्रकरणे जोडल्याने गोंधळ निर्माण झाल्याचे पोलिसांनी म्हटले आहे.