प्रयागराजमधील महाकुंभमेळ्यात ‘इतक्या’ कोटी भाविकांनी केलं पवित्र स्नान, आकडेवारी समोर

On: February 27, 2025 10:05 AM

---Advertisement---

Mahakumbh Mela 2025 | जगातील सर्वात मोठा धार्मिक सोहळा म्हणून ओळखल्या जाणाऱ्या प्रयागराज (Prayagraj) येथील महाकुंभमेळ्याची (Mahakumbh Mela 2025 ) सांगता महाशिवरात्रीला (Mahashivratri) झाली. ४५ दिवस चाललेल्या या सोहळ्यात तब्बल ६६.२१ कोटी भाविकांनी पवित्र स्नान केल्याची माहिती उत्तर प्रदेश (Uttar Pradesh) सरकारने दिली आहे.

महाकुंभमेळ्याची विक्रमी सांगता

१३ फेब्रुवारीपासून सुरू झालेल्या महाकुंभमेळ्यात बुधवारी, महाशिवरात्रीच्या दिवशी १.४४ कोटी लोकांनी पवित्र स्नान केले. हर हर महादेवच्या जयघोषात, भाविकांनी त्रिवेणी संगमावर (Triveni Sangam) डुबकी मारली आणि या सोहळ्याची सांगता झाली.

उत्तर प्रदेश सरकारने दावा केला आहे की, जगात जितके हिंदूधर्मीय आहेत, त्यातील निम्म्या लोकांनी महाकुंभमध्ये सहभाग घेतला. महाशिवरात्रीला स्नानासाठी आलेल्या भाविकांमुळे प्रयागराजमध्ये वाहनांच्या लांबच लांब रांगा लागल्या होत्या.

चेंगराचेंगरीत ३० जणांचा मृत्यू

२९ जानेवारीला मौनी अमावस्येच्या दिवशी महाकुंभ मेळ्यात झालेल्या चेंगराचेंगरीत ३० लोकांचा मृत्यू झाला, तर ६० जण जखमी झाले. भाविक त्रिवेणी संगमावर जाण्यासाठी घाई करत असल्याने, रस्त्यात लावलेले बॅरिकेड बाजूला सारून पुढे जाण्याचा प्रयत्न करत होते, त्यामुळे ही दुर्घटना घडली.

या दुर्घटनेनंतर उत्तर प्रदेश सरकारने गर्दीच्या व्यवस्थापनासाठी अधिक प्रभावी उपाययोजना केल्या. झारखंड मुक्ती मोर्चाच्या (Jharkhand Mukti Morcha) राज्यसभा खासदार (MP) महुआ माझी (Mahua Majhi) सुद्धा महाकुंभमेळ्याहून परतत असताना, त्यांच्या गाडीला अपघात होऊन त्या जखमी झाल्या.

राजकीय व्यक्ती आणि सेलिब्रिटींची उपस्थिती

या मेळाव्यात अनेक राजकीय व्यक्ती गैरहजर होत्या. उद्धवसेनेचे (Uddhavsena) प्रमुख उद्धव ठाकरे (Uddhav Thackeray) व विरोधी पक्षनेते राहुल गांधी (Rahul Gandhi) कुंभमध्ये अनुपस्थित राहिल्याने, रामदास आठवले (Ramdas Athawale) यांनी हिंदू मतदारांनी त्यांच्यावर बहिष्कार घालावा, असे म्हटले. (Mahakumbh Mela 2025 )

अभिनेत्री प्रीती झिंटा (Preity Zinta) हिनेदेखील कुंभात पवित्र स्नान केले. तिने तिसऱ्यांदा पवित्र स्नान केल्याचे सांगितले. न्यूयॉर्क (New York) येथील भारतीय वाणिज्य दूतावासाने (Indian Consulate) सोमवारी महाकुंभ या विषयावर विशेष कार्यक्रमाचे आयोजन केले होते, ज्यात हार्वर्ड बिझिनेस स्कूलचे (Harvard Business School) अनेक लोक सहभागी झाले होते.