आजची रात्र इराणसाठी विनाशकारी ठरणार? इस्रायलने दिला मोठा इशारा

Iran War Update | इराण-अमेरिका युद्धाचा सहावा आठवडा सुरू झाला असून परिस्थिती आता अत्यंत स्फोटक वळणावर पोहोचली आहे. राष्ट्राध्यक्ष डोनाल्ड ट्रम्प (Donald Trump) यांनी दिलेला निर्वाणीचा इशारा आणि इराणचा आक्रमक पवित्रा यामुळे आजची रात्र या संघर्षासाठी निर्णायक ठरू शकते. होर्मुझची सामुद्रधुनी (Strait of Hormuz) खुली करण्याच्या मुद्द्यावरून दोन्ही देशांमधील तणाव शिगेला पोहोचला असून सौदी-बहरैन पूलही (Saudi-Bahrain Bridge) खबरदारीचा उपाय म्हणून बंद करण्यात आला आहे.

ट्रम्प यांचा अल्टिमेटम

राष्ट्राध्यक्ष ट्रम्प यांनी इराणला स्पष्ट ताकीद दिली आहे की, जर निर्धारित वेळेत होर्मुझचा सागरी मार्ग खुला केला नाही, तर अमेरिका इराणच्या वीज प्रकल्पांवर आणि महत्त्वाच्या नागरी पायाभूत सुविधांवर भीषण हल्ले करेल. या इशाऱ्याला प्रत्युत्तर देताना इराणने ‘नुकसान भरपाई’ मिळाल्याशिवाय माघार घेणार नसल्याचे जाहीर केले आहे. इराणच्या राष्ट्राध्यक्षांनी “१.४ कोटी नागरिक देशासाठी बलिदान देण्यास तयार आहेत,” असे भावनिक आवाहन करत युद्धाची तीव्रता वाढवण्याचे संकेत दिले आहेत.

या रणधुमाळीत अमेरिकेने इराणच्या सीमेत शिरून आपल्या एका जखमी वैमानिकाची यशस्वी सुटका केली आहे. या ‘मिशन इम्पॉसिबल’ (Mission Impossible) मोहिमेत कोणतीही जीवितहानी झाली नसल्याचे व्हाईट हाऊसने स्पष्ट केले. दरम्यान, एक ए-१० थंडरबोल्ट II (A-10 Thunderbolt II) विमान कोसळल्याचीही घटना घडली, मात्र त्यातील वैमानिकाला वाचवण्यात यश आले आहे.

राजनैतिक हालचाली आणि भारताची भूमिका

युद्धाचा भडका उडू नये म्हणून ओमान, पाकिस्तान आणि इजिप्त यांसारखे देश मध्यस्थीचा प्रयत्न करत आहेत. ओमानकडून इराणसोबत होर्मुझची सामुद्रधुनी पुन्हा उघडण्यासाठी वाटाघाटी सुरू आहेत. मात्र, ट्रम्प यांनी दिलेली ६ एप्रिलची (भारतीय वेळेनुसार ७ एप्रिल) मुदत संपत असतानाच एक महत्त्वाची घडामोड समोर आली आहे.

मिळालेल्या माहितीनुसार, इराणने दिलेल्या मुदतीच्या अवघ्या ६० मिनिटे आधी राष्ट्राध्यक्ष ट्रम्प हे अमेरिकेतील भारताच्या राजदूतांसोबत (Indian Ambassador to US) एका गुप्त स्नेहभोजन बैठकीला उपस्थित राहणार आहेत. ही बैठक केवळ योगायोग आहे की भारताची या संघर्षात मोठी भूमिका असणार आहे, याबाबत जागतिक स्तरावर चर्चा सुरू झाली आहे. इराणच्या ऊर्जा केंद्रांवर हल्ले झाल्यास जागतिक तेल पुरवठा विस्कळीत होऊन अर्थव्यवस्थेवर त्याचे विनाशकारी परिणाम होऊ शकतात, असा इशारा तज्ज्ञांनी दिला आहे.