India-US relations | अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी बेकायदेशीर स्थलांतरितांविरोधात कठोर भूमिका घेतली आहे. याचाच भाग म्हणून अमेरिकेत अनधिकृतरित्या राहणाऱ्या काही भारतीय नागरिकांना विशेष लष्करी विमानाद्वारे भारतात परत पाठवण्यात आले. मात्र, या नागरिकांना प्रवासादरम्यान हातापायात बेड्या घालण्यात आल्याने तीव्र संताप व्यक्त होत आहे. (India-US relations)

भारतीय नागरिकांवर कठोर कारवाई

बेकायदेशीररीत्या अमेरिकेत प्रवेश केलेल्या आणि तिथे वास्तव्यास असलेल्या भारतीय नागरिकांना अमेरिकन प्रशासनाने परत पाठवले. मात्र, त्यांच्या संपूर्ण प्रवासादरम्यान त्यांना हातपायात बेड्या घालण्यात आल्याने ही कारवाई अपमानास्पद ठरली आहे. या घटनेवर अनेक नागरिक आणि राजकीय नेत्यांनी नाराजी व्यक्त केली. या घटनेनंतर भारताच्या संसदेच्या दोन्ही सभागृहांमध्येही मोठ्या प्रमाणात गदारोळ झाला.

परराष्ट्रमंत्री एस. जयशंकर (S. Jaishankar) यांनी या प्रकरणावर स्पष्टीकरण दिले. ते म्हणाले की, कोणत्याही देशात बेकायदेशीर वास्तव्य करणाऱ्या नागरिकांना परत त्यांच्या मूळ देशात पाठवणे ही आंतरराष्ट्रीय पातळीवरील सर्वसाधारण प्रक्रिया आहे. अमेरिकेच्या इमिग्रेशन आणि कस्टम्स एन्फोर्समेंट (ICE) संस्थेकडून अशा नागरिकांना परत पाठवण्याची प्रक्रिया पार पडते.

हातपाय बांधण्याच्या प्रक्रियेवर सरकारचे स्पष्टीकरण

भारतीय नागरिकांना बेड्या ठोकून परत पाठवण्याच्या मुद्द्यावर स्पष्टीकरण देताना एस. जयशंकर यांनी सांगितले की, २०१२ पासून लागू असलेल्या एका नियमानुसार सुरक्षेच्या कारणास्तव माघारी पाठवले जाणारे नागरिक विमानात असताना बांधून ठेवले जातात. मात्र, या प्रक्रियेत महिलांना आणि लहान मुलांना सवलत दिली जाते. त्यांना अशा प्रकारे बेड्या घातल्या जात नाहीत.

तथापि, भारतीय प्रशासन अमेरिकेच्या सरकारसोबत सातत्याने चर्चा करत असून, भविष्यात भारतीय नागरिकांना अशा प्रकारे दुर्व्यवहार सहन करावा लागू नये यासाठी प्रयत्नशील आहे. आजच्या संसद अधिवेशनातही हा विषय उपस्थित करण्यात आला. सभागृहात गोंधळ झाल्यानंतर सभापती जगदीप धनखड (Jagdeep Dhankhar) यांनी सरकारकडून अधिकृत स्पष्टीकरण देण्याचे निर्देश दिले, त्यानंतर एस. जयशंकर यांनी संपूर्ण घटनाक्रम स्पष्ट केला. (India-US relations)

Title : India-US relations Indian Deportees Shackled by US Officials