CDSCO FDC Ban India | केंद्रीय औषध नियामक संस्था, सीडीएससीओने (Central Drugs Standard Control Organisation – CDSCO), देशातील ३५ फिक्स्ड डोस कॉम्बिनेशन (Fixed-Dose Combination – FDC) औषधांच्या उत्पादन, विक्री आणि वितरणावर बंदी आणली आहे. या औषधांची सुरक्षा आणि परिणामकारकतेची पुरेशी तपासणी न करताच त्यांना परवाने दिल्याने सार्वजनिक आरोग्यास गंभीर धोका निर्माण झाल्याचे कारण देत ही कारवाई करण्यात आली आहे.
सुरक्षेशिवाय परवाने, आरोग्याला धोका
भारतीय औषध महानियंत्रक (DCGI) डॉ. राजीव रघुवंशी (Dr. Rajeev Raghuvanshi) यांनी यासंदर्भात ११ एप्रिल रोजी एक पत्र जारी केले आहे, ज्यात जानेवारी २०२३ च्या कार्यालयाच्या पत्राचा संदर्भ देण्यात आला आहे. यात म्हटले आहे की, अनेक FDC औषधांना त्यांची सुरक्षितता आणि प्रभावीपणा तपासल्याशिवाय उत्पादन आणि विक्रीचे परवाने देण्यात आले होते.
FDC म्हणजे एकापेक्षा जास्त औषधी घटक निश्चित प्रमाणात एकत्र असलेली औषधे. अशा काही औषधांच्या बाबतीत आवश्यक वैज्ञानिक मूल्यांकन न झाल्यामुळे, त्यांच्या वापरामुळे लोकांच्या आरोग्याला आणि सुरक्षिततेला गंभीर धोका पोहोचू शकतो, असे नियामकांनी म्हटले आहे. बंदी घालण्यात आलेल्या औषधांमध्ये वेदनाशामक, मधुमेहावरील आणि पोषण पूरक औषधांचा समावेश आहे.
कडक पालन आणि कारवाईचे आदेश
सीडीएससीओने सर्व राज्ये आणि केंद्रशासित प्रदेशांतील औषध नियंत्रकांना (Drug Controllers) या ३५ FDC औषधांचे उत्पादन, विक्री आणि वितरण तात्काळ थांबवण्याचे सक्त निर्देश दिले आहेत. या औषधांविरोधात योग्य ती कारवाई करण्याचे आदेशही देण्यात आले आहेत.
औषध नियामकांनी राज्यांना त्यांच्या स्तरावरील औषध मंजुरी प्रक्रियेचा आढावा घेण्यास आणि नियमांचे काटेकोर पालन सुनिश्चित करण्यास सांगितले आहे. या बंदीमुळे अवैज्ञानिक आणि संभाव्यतः धोकादायक असलेल्या औषधांवर नियंत्रण मिळण्यास मदत होईल.
Title : CDSCO Bans 35 FDC Drugs in India Citing Health Risks
