Air India l एअर इंडियाने (Air India) परदेशात प्रवास करणाऱ्यांसाठी एक मोठी घोषणा केली आहे. आता एअर इंडियाच्या प्रवाशांना 12 भारतीय शहरांमधून 26 युरोपीय शहरांमध्ये प्रवास करण्याची नवीन सुविधा मिळणार आहे. यासाठी एअर इंडियाने जर्मन एअरलाइन लुफ्थांसा (Lufthansa), ऑस्ट्रियन एअरलाइन्स (Austrian Airlines) आणि स्विस इंटरनॅशनल एअरलाइन्स (Swiss International Airlines) सोबत कोड शेअरिंग (code sharing) कराराचा विस्तार केला आहे.
एअर इंडियाची नवीन आंतरराष्ट्रीय भागीदारी :
एअर इंडियाने ऑस्ट्रियन एअरलाइन्ससोबत नवीन कोड शेअरिंग करार केला आहे, तसेच लुफ्थांसा आणि स्विस एअरलाइन्ससोबतचा सध्याचा करार वाढवला आहे. याचा फायदा प्रवाशांना असा होईल की, ते एअर इंडियाची फ्लाइट बुक करूनही या परदेशी एअरलाइन्सच्या मार्गांचा लाभ घेऊ शकतील. यामुळे युरोप आणि इतर आंतरराष्ट्रीय ठिकाणी प्रवास करणे अधिक सोपे होईल. या नवीन करारानंतर, एअर इंडिया, लुफ्थांसा आणि स्विस एअरलाइन्समध्ये कोड शेअरिंग मार्गांची संख्या 55 वरून सुमारे 100 पर्यंत वाढली आहे.
Air India l नवीन मार्गांमध्ये कोणती शहरे समाविष्ट? :
नवीन कोड शेअरिंग करारानुसार, प्रवाशांना भारतातील 12 प्रमुख शहरांमधून आणि युरोपमधील 26 शहरांमध्ये प्रवास करण्याची सुविधा मिळेल.
भारतीय शहरे: दिल्ली, मुंबई, बंगळूरु (Bengaluru), हैदराबाद (Hyderabad), चेन्नई (Chennai), कोलकाता (Kolkata), अहमदाबाद (Ahmedabad), पुणे (Pune), कोची (Kochi), त्रिवेंद्रम (Trivandrum), लखनौ (Lucknow), जयपूर( Jaipur).
युरोपीय शहरे: व्हिएन्ना (Vienna), झुरिच (Zurich), फ्रँकफर्ट (Frankfurt), म्युनिक (Munich), बर्लिन (Berlin), डसेलडॉर्फ (Dusseldorf), स्टटगार्ट (Stuttgart), जिनिव्हा (Geneva), ब्रुसेल्स (Brussels), प्राग (Prague), वॉशिंग्टन डीसी (Washington DC), टोरंटो (Toronto) इत्यादी.
एअर इंडियाच्या आंतरराष्ट्रीय उड्डाणे दुप्पट होणार
पुढील तीन वर्षांत एअर इंडियाने आपल्या आंतरराष्ट्रीय उड्डाणे दुप्पट करण्याची योजना आखली आहे. सध्या एअर इंडिया दरवर्षी 313 आंतरराष्ट्रीय उड्डाणे चालवते. लवकरच ही संख्या दुप्पट केली जाईल, जेणेकरून लांब पल्ल्याच्या आंतरराष्ट्रीय बाजारपेठेत एअर इंडियाची उपस्थिती मजबूत होईल. एअर इंडियाचे सीसीओ (CCO – Chief Commercial Officer) निपुण अग्रवाल (Nipun Aggarwal) म्हणाले, “या भागीदारीमुळे आमच्या ग्राहकांना लुफ्थांसा ग्रुपच्या विमानांवर युरोपमधील अधिक ठिकाणांवर प्रवास करण्याची संधी मिळेल.”
आंतरराष्ट्रीय बाजारात वाढ
भारतातून परदेशात प्रवास करणाऱ्या प्रवाशांची संख्या सातत्याने वाढत आहे. हे लक्षात घेऊन, भारतीय विमान कंपन्या त्यांचे आंतरराष्ट्रीय नेटवर्क वाढवत आहेत. भारतीय एअरलाइन्सचा आंतरराष्ट्रीय हवाई प्रवासातील हिस्सा आता 46 टक्के झाला आहे. जानेवारी ते सप्टेंबर 2024 मध्ये भारतीय एअरलाइन्सने 2.4 कोटी प्रवाशांना प्रवास घडवला. एअर इंडिया (टाटा ग्रुप) (Tata Group) चा विमान वाहतूक बाजारातील हिस्सा 28 टक्के आहे. 75 हून अधिक परदेशी एअरलाइन्स देखील भारतातून प्रवाशांची वाहतूक करत आहेत.
प्रवाशांना कसा फायदा होईल?
अधिक कनेक्टीविटी: नवीन कोड शेअरिंग करारामुळे प्रवाशांना अधिक पर्याय मिळतील.
उत्तम ट्रांझिट सुविधा: आंतरराष्ट्रीय प्रवास आता अधिक सोपा आणि सोयीस्कर होईल.
वेळेची बचत: जास्त थेट आणि कनेक्टिंग फ्लाइट पर्याय उपलब्ध होतील.
स्वस्त तिकीट दर: कोड शेअरिंगमुळे तिकिटांच्या किमतींमध्ये स्पर्धा वाढेल, ज्यामुळे प्रवाशांना फायदा होईल.
