Varanasi Rape Case | संपूर्ण देशाला हादरवून सोडणारी एक अत्यंत संतापजनक आणि क्रूर घटना उत्तर प्रदेशातील (Uttar Pradesh) वाराणसी (Varanasi Rape Case) येथून समोर आली आहे. येथे एका १९ वर्षीय तरुणीवर तब्बल २३ नराधमांनी सात दिवसांपर्यंत वेगवेगळ्या ठिकाणी नेऊन लैंगिक अत्याचार (Sexual Assault) केल्याचा आरोप आहे. पीडित तरुणी घरी परतल्यानंतर तिने आपल्या आईला आपबिती सांगितली, ज्यानंतर पोलिसांनी गुन्हा दाखल करत ६ आरोपींना अटक केली आहे. या घटनेने देशभरात तीव्र संतापाची लाट उसळली आहे.
२३ नराधमांकडून अत्याचार
मिळालेल्या माहितीनुसार, पीडित १९ वर्षीय तरुणी मागील महिन्यात घरातून निघून गेली होती. त्यानंतरच्या सात दिवसांच्या काळात तिला नरकयातना भोगाव्या लागल्या. वेगवेगळ्या व्यक्तींनी तिला वेगवेगळ्या ठिकाणी नेले आणि तिच्यावर आळीपाळीने लैंगिक अत्याचार केले. एकूण २३ जणांनी हा अत्याचार केल्याचा आरोप आहे. इतकेच नाही, तर या अत्याचारादरम्यान आरोपींनी पीडितेला अमली पदार्थ (Drugs) देऊन तिच्या असहाय्यतेचा गैरफायदा घेतला आणि विकृतीचा कळस गाठला, असेही म्हटले जात आहे.
सात दिवसांच्या या भीषण अत्याचारांनंतर पीडित तरुणी कशीबशी घरी परतली. तिने घडलेला सर्व प्रकार आपल्या आईला सांगितला. आपल्या मुलीसोबत घडलेले हे अमानुष कृत्य ऐकून आईला मोठा धक्का बसला.
Varanasi Rape Case | आईच्या तक्रारीनंतर गुन्हा दाखल
मुलीने आपबिती सांगितल्यानंतर, तिच्या आईने रविवारी (६ एप्रिल) पोलीस ठाण्यात जाऊन लेखी तक्रार (Written Complaint) दाखल केली. पोलिसांनी प्रकरणाचे गांभीर्य लक्षात घेऊन तात्काळ कारवाईला सुरुवात केली. पीडितेच्या जबाबाच्या आधारे एकूण २३ जणांविरोधात अत्याचारासह विविध गंभीर कलमांन्वये गुन्हा दाखल करण्यात आला आहे.
पीडित तरुणीने यातील १२ आरोपींची नावे पोलिसांना सांगितली आहेत, तर उर्वरित ११ आरोपी अनोळखी असल्याचे तिने म्हटले आहे. पोलिसांनी अत्यंत वेगाने तपास करत आतापर्यंत ६ आरोपींना अटक (Arrests) केली आहे. उर्वरित आरोपींचा शोध घेण्यासाठी पोलिसांची पथके रवाना झाली आहेत. या घटनेचा पुढील तपास पोलीस करत आहेत. महाराष्ट्रासह देशभरात महिलांवरील अत्याचाराच्या घटना वाढत असताना, वाराणसीतील या घटनेने पुन्हा एकदा महिलांच्या सुरक्षेचा प्रश्न ऐरणीवर आणला आहे.
