Petrol Diesel Price Hike | मध्य-पूर्वेतील संघर्षामुळे जागतिक बाजारात कच्च्या तेलाच्या किंमतींमध्ये मोठी उसळी पाहायला मिळत आहे. याचा परिणाम आता भारतातील इंधन दरांवर होणार का, अशी चर्चा सुरू झाली आहे. एलपीजी सिलेंडरच्या दरवाढीनंतर आता पेट्रोल-डिझेलही महागण्याची शक्यता व्यक्त होत असून सर्वसामान्यांच्या खिशावर अतिरिक्त भार पडण्याची भीती निर्माण झाली आहे.
कच्च्या तेलाच्या किंमतींमध्ये मोठी उसळी :
मध्य-पूर्वेतील तणावामुळे जागतिक बाजारात कच्च्या तेलाच्या दरांनी मोठी झेप घेतली आहे. सध्या अमेरिकन बेंचमार्क WTI (West Texas Intermediate) क्रूडची किंमत सुमारे 94.99 डॉलर प्रति बॅरलपर्यंत पोहोचली आहे, तर ब्रेंट क्रूड (Brent Crude) जवळपास 102.65 डॉलर प्रति बॅरलच्या स्तरावर व्यवहार करत आहे. या दरांमध्ये रोज काही प्रमाणात चढ-उतार होत असला तरी युद्ध सुरू झाल्यानंतर दरांमध्ये सातत्याने वाढ होत असल्याचे दिसत आहे.
युद्धापूर्वी कच्च्या तेलाच्या किंमती 65 ते 75 डॉलर दरम्यान होत्या. मात्र अवघ्या एका महिन्यात या किंमतींनी 100 डॉलरचा टप्पा ओलांडला आहे. म्हणजेच जवळपास 43 टक्क्यांहून अधिक वाढ झाली आहे. सामान्यतः इतकी वाढ होण्यासाठी जवळपास एक वर्ष लागते, मात्र यावेळी ती अत्यंत कमी कालावधीत झाल्याने बाजारात मोठी चिंता व्यक्त केली जात आहे.
Petrol Diesel Price Hike | जागतिक पुरवठा साखळीवर परिणाम :
पश्चिम आशियातील प्रदेश हा जगातील इंधन पुरवठ्याचा प्रमुख केंद्र मानला जातो. या भागात संघर्ष वाढल्यानंतर जागतिक पुरवठा साखळीवर त्याचा मोठा परिणाम झाल्याचे तज्ज्ञांचे मत आहे. युद्धाच्या पार्श्वभूमीवर मालवाहू जहाजांच्या सुरक्षेबाबतही चिंता वाढली असून काही मार्गांवर वाहतूक अडथळ्यांमध्ये येत असल्याचे सांगितले जात आहे.
यामुळे कच्च्या तेलाच्या पुरवठ्यात अनिश्चितता निर्माण झाली असून अनेक देशांनी साठवणूक वाढवण्यास सुरुवात केली आहे. या परिस्थितीमुळे जागतिक बाजारात इंधनाच्या दरांवर दबाव वाढला आहे. भारतासारख्या मोठ्या आयातदार देशांवर त्याचा परिणाम होण्याची शक्यता नाकारता येत नाही.
पेट्रोल-डिझेल दरवाढीची शक्यता? :
जागतिक बाजारात कच्च्या तेलाच्या दरांमध्ये वाढ झाली की त्याचा परिणाम पेट्रोल आणि डिझेलच्या किंमतींवर होतो. भारतात इंधनासाठी मोठ्या प्रमाणावर आयातीवर अवलंबून राहावे लागते. त्यामुळे कच्च्या तेलाचे दर वाढले तर देशांतर्गत पेट्रोल-डिझेल महागण्याची शक्यता वाढते.
दरम्यान, अलीकडेच एलपीजी सिलेंडरच्या किंमतीत सुमारे 60 रुपयांची वाढ झाली असून काही भागांमध्ये सिलेंडरचा तुटवडा जाणवत असल्याच्या तक्रारीही समोर आल्या आहेत. त्यामुळे आधीच महागाईच्या दबावाखाली असलेल्या नागरिकांमध्ये चिंता वाढली आहे. जर पेट्रोल-डिझेलच्या किंमतीही वाढल्या, तर वाहतूक खर्च वाढून भाजीपाला, फळे, किराणा आणि इतर दैनंदिन वस्तूंच्या दरांवर त्याचा परिणाम होण्याची शक्यता आहे.
