Thalapathy Vijay | देशभरात सुरू असलेल्या नीट (NEET) परीक्षा वादाच्या पार्श्वभूमीवर विद्यार्थ्यांचे आंदोलन अधिक तीव्र होत आहे. जंतर-मंतर (Jantar Mantar) येथे आंदोलन सुरू असतानाच तमिळनाडूचे मुख्यमंत्री थलपती विजय (Thalapathy Vijay) यांनी विद्यार्थ्यांच्या भूमिकेला पाठिंबा दर्शवत नीट परीक्षा पूर्णपणे रद्द करण्याची मागणी केली आहे. त्यांच्या तमिळगा वेत्री कळगम पक्षानेही यासंदर्भात केंद्र सरकारवर टीका केली आहे.
विद्यार्थी आंदोलनावर विजय यांची भूमिका :
देशभरात सुरू असलेल्या नीट पेपरफुटी प्रकरण (NEET Paper Leak Case) आणि केंद्रीय शिक्षण मंत्र्यांच्या राजीनाम्याच्या मागणीसाठी कॉकरोच जनता पार्टी यांनी आंदोलन छेडले आहे. राजधानीत सुरू झालेल्या या आंदोलनाचे पडसाद आता विविध राज्यांमध्ये उमटत असून अनेक सामाजिक आणि राजकीय संघटनांनी त्याला पाठिंबा दर्शवला आहे. अशा वातावरणात मुख्यमंत्री थलपती विजय यांनीही या विषयावर आपली स्पष्ट भूमिका मांडली आहे.
बुधवारी प्रसिद्ध केलेल्या निवेदनात आणि सोशल मीडिया पोस्टद्वारे विजय यांनी राहुल गांधी (Rahul Gandhi) तसेच इतर विरोधी पक्षांच्या नेत्यांना ताब्यात घेतल्याच्या घटनेचा निषेध व्यक्त केला. विद्यार्थी आंदोलकांवर करण्यात आलेली पोलीस कारवाई ही लोकशाहीच्या मूल्यांविरोधात असल्याचे त्यांनी म्हटले. संसद परिसरात आंदोलन करणाऱ्या विरोधी पक्षांसोबत टीव्हीके (TVK) ठामपणे उभी असल्याचे त्यांनी स्पष्ट केले. त्याचबरोबर त्यांच्या पक्षाचा नीट परीक्षेला सुरुवातीपासूनच विरोध असल्याची भूमिकाही त्यांनी पुन्हा अधोरेखित केली.
Thalapathy Vijay | नीट रद्द करण्याची मागणी, राहुल गांधींच्या अटकेवर टीका :
टीव्हीकेने सोशल मीडियावरील पोस्टमध्ये म्हटले आहे की, नीट परीक्षा सुरू झाल्यापासून तिच्या विश्वासार्हतेवर सातत्याने प्रश्न उपस्थित होत आहेत. या परीक्षेमुळे विद्यार्थ्यांवर मोठा मानसिक ताण निर्माण होत असून त्यांच्या उच्च शिक्षणाच्या आणि वैद्यकीय क्षेत्रातील करिअरच्या स्वप्नांवर परिणाम होत आहे. त्यामुळे विद्यार्थ्यांचे नुकसान थांबवण्यासाठी केंद्र सरकारने नीट परीक्षा पूर्णपणे रद्द करावी, अशी मागणी पक्षाने केली आहे.
याशिवाय, पंतप्रधानांच्या निवासस्थानाबाहेर आंदोलनादरम्यान राहुल गांधी, मल्लिकार्जुन खर्गे (Mallikarjun Kharge) आणि प्रियांका गांधी (Priyanka Gandhi) यांना ताब्यात घेतल्याच्या घटनेवरही टीव्हीकेने तीव्र प्रतिक्रिया दिली. दिल्ली पोलिसांनी राहुल गांधी यांना फरफटत नेऊन हातकड्या घातल्याचा आरोप करत हा प्रकार लोकशाही हक्कांवरील आघात असल्याचे पक्षाने म्हटले. दरम्यान, सोमवारी नवी दिल्ली येथे हजारो विद्यार्थी, युवक संघटना आणि विविध राजकीय पक्षांचे कार्यकर्ते ‘संसद मोर्चा’त सहभागी झाले होते.
तसेच आंदोलकांनी केंद्रीय शिक्षण मंत्री धर्मेंद्र प्रधान (Dharmendra Pradhan) यांच्या राजीनाम्याची मागणी करत नीट वादग्रस्त प्रकरणातील विद्यार्थ्यांना न्याय आणि परीक्षा व्यवस्थेत व्यापक सुधारणा करण्याची मागणी केली. या मोर्चादरम्यान मोठा पोलीस बंदोबस्त ठेवण्यात आला होता. आंदोलकांनी संसदेकडे कूच करण्याचा प्रयत्न करताच बॅरिकेड्स उभारण्यात आले आणि त्यानंतर पोलिसांनी लाठीचार्ज केला.
