Microsoft Employee | तंत्रज्ञान क्षेत्रातील मोठी कंपनी असलेल्या मायक्रोसॉफ्टने (Microsoft) खर्चावर नियंत्रण ठेवण्यासाठी आणि आर्टिफिशियल इंटेलिजेंसमध्ये (artificial intelligence) वाढत्या गुंतवणुकीमुळे पुन्हा एकदा मोठ्या प्रमाणात कर्मचाऱ्यांची कपात करण्याचा निर्णय घेतला आहे. कंपनी आता जागतिक स्तरावर सुमारे ६,००० कर्मचाऱ्यांना, म्हणजेच आपल्या एकूण कर्मचाऱ्यांच्या सुमारे ३ टक्के लोकांना कामावरून कमी करणार आहे.
सर्वात मोठी कर्मचारी कपात :
यापूर्वी, २०२३ मध्ये मायक्रोसॉफ्टने १०,००० कर्मचाऱ्यांची छाटणी केली होती, जी आतापर्यंतची सर्वात मोठी कर्मचारी कपात होती. आताची ही कपात कंपनीच्या इतिहासातील दुसरी सर्वात मोठी छाटणी मानली जात आहे. या कपातीचा परिणाम कंपनीतील सर्व स्तरांतील कर्मचाऱ्यांवर होणार आहे, विशेषतः व्यवस्थापन स्तरावरील भूमिकांवर याचा अधिक परिणाम जाणवणार आहे.
कंपनीने प्रभावित कर्मचाऱ्यांसाठी दोन पर्याय ठेवले आहेत. पहिल्या पर्यायात, कर्मचाऱ्यांना ६० दिवसांच्या नोटिस कालावधीचा पगार आणि बोनस तसेच इतर लाभ देऊन त्यांची सेवा समाप्त केली जाईल. दुसऱ्या पर्यायात, कर्मचारी १६ आठवड्यांच्या विच्छेद वेतनासह “ग्लोबल वॉलंटरी सेपरेशन एग्रीमेंट” (Global Voluntary Separation Agreement) अंतर्गत स्वेच्छेने कंपनीतून बाहेर पडण्याचा पर्याय निवडू शकतात. काही विशिष्ट प्रकरणांमध्ये, कर्मचाऱ्यांच्या कामगिरीत सुधारणा करण्यासाठी वेळमर्यादा देखील दिली जाईल.
Microsoft Employee | याचा परिणाम जागतिक स्तरावर जाणवणार :
या कर्मचारी कपातीच्या निर्णयावर मायक्रोसॉफ्टच्या प्रवक्त्याने प्रतिक्रिया दिली आहे. ते म्हणाले, “गतिशील बाजारपेठेत यशस्वी राहण्यासाठी आम्ही वेळोवेळी आमच्या संघटनेत आवश्यक बदल करत असतो.” कंपनीचे म्हणणे आहे की, ते त्यांच्या व्यवस्थापन रचनेला अधिक सुसंगठित आणि कार्यक्षम बनवू इच्छितात.
जून २०२४ पर्यंत मायक्रोसॉफ्टमध्ये एकूण २,२८,००० कर्मचारी कार्यरत होते, त्यापैकी १,९८५ कर्मचारी वॉशिंग्टनमध्ये (Washington) काम करत होते. या छाटणीचा परिणाम जागतिक स्तरावर जाणवणार आहे आणि मुख्यत्वे अशा टीम्सवर याचा परिणाम होईल, ज्या आता एआय आणि तांत्रिक कौशल्याच्या नवीन युगातील मायक्रोसॉफ्टच्या धोरणाशी जुळत नाहीत.
