Kangana Ranaut | भाजप खासदार आणि अभिनेत्री कंगना रणौत (Kangana Ranaut) यांनी राष्ट्रीय स्वयंसेवक संघामध्ये सहभागी होण्याची इच्छा व्यक्त केल्यानंतर राजकीय प्रतिक्रिया उमटू लागल्या आहेत. त्यांच्या या वक्तव्यावर काँग्रेस (Congress) नेते अजय राय (Ajay Rai) यांनी तीव्र टीका करत खासदारकीचा राजीनामा देण्याचा सल्ला दिला आहे. यामुळे राजकीय वर्तुळात नव्या चर्चांना सुरुवात झाली आहे.
अजय राय यांचा कंगनांवर निशाणा :
काही दिवसांपूर्वी कंगना रणौत यांनी राष्ट्रीय स्वयंसेवक संघात सहभागी होण्याची इच्छा सार्वजनिकपणे व्यक्त केली होती. त्यावेळी त्यांनी, समाज इतरांच्या अशा निर्णयांना स्वीकारतो, मग माझ्या निर्णयावर प्रश्नचिन्ह उपस्थित करू नये, असे मत मांडले होते. त्यांच्या या विधानानंतर विविध स्तरातून प्रतिक्रिया येऊ लागल्या असून आता उत्तर प्रदेश काँग्रेस प्रदेशाध्यक्ष अजय राय यांनीही त्यावर भाष्य केले आहे.
अजय राय यांनी कंगना रणौत यांनी लोकसभा सदस्यत्वाचा राजीनामा द्यावा आणि त्यानंतर राष्ट्रीय स्वयंसेवक संघाच्या प्रचारकाची भूमिका स्वीकारावी, असा टोला लगावला. त्यांच्या या वक्तव्यानंतर राजकीय वातावरण पुन्हा तापले असून, यावर कंगना रणौत काय प्रतिक्रिया देतात याकडे सर्वांचे लक्ष लागले आहे.
Kangana Ranaut | भाजपच्या पराभवावरही साधला निशाणा :
यावेळी अजय राय यांनी दतिया आणि बांकीपूर विधानसभा पोटनिवडणुकांतील भाजपच्या पराभवाचाही उल्लेख केला. माता पीतांबरा देवीच्या कृपेने काँग्रेसने दतिया मतदारसंघात सलग दुसऱ्यांदा विजय मिळवला असल्याचे त्यांनी सांगितले. तसेच बांकीपूरमध्ये काँग्रेस समर्थित उमेदवार प्रशांत कुमार विजयी झाल्याचे नमूद करत भाजपचे राष्ट्रीय अध्यक्ष नितीन नवीन (Nitin Navin) स्वतःच्या बूथवरही पराभूत झाल्याचा दावा त्यांनी केला. “आमचा बूथ सर्वात मजबूत” असा दावा करणाऱ्या पक्षाचा बूथ आता सर्वात कमकुवत ठरल्याने भाजपची उलटी गिनती सुरू झाली आहे, अशी टीकाही त्यांनी केली.
याशिवाय, ‘विद्यार्थ्यांचा आवाज’ या उपक्रमांतर्गत कोटा आणि डेहराडून येथील कार्यक्रमांनंतर ८ ऑगस्ट रोजी सायंकाळी ५ वाजता प्रयागराज (Prayagraj) येथील केपी ग्राउंड येथे राहुल गांधी (Rahul Gandhi) विद्यार्थ्यांशी थेट संवाद साधणार असल्याची माहिती अजय राय यांनी दिली. उत्तर प्रदेशातील लाखो विद्यार्थी या कार्यक्रमात सहभागी होणार असल्याचे त्यांनी सांगितले. तसेच दान चोरीला विरोध केल्याप्रकरणी खासदार पप्पू यादव (Pappu Yadav) यांच्यावर झालेल्या हल्ल्याचा निषेध करत त्यांनी या घटनेला लोकशाहीवरील हल्ला असल्याचे म्हटले.
