Team India | भारतीय क्रिकेट संघात श्रीलंका दौऱ्यापूर्वी महत्त्वाचा बदल करण्यात आला आहे. सलग टी-20 मालिका गमावल्यानंतर भारतीय क्रिकेट नियामक मंडळाने (BCCI) संघाच्या सपोर्ट स्टाफमध्ये मोठा निर्णय घेत नवीन क्षेत्ररक्षण प्रशिक्षकाची नियुक्ती केली आहे. आता या बदलाचा संघाच्या कामगिरीवर काय परिणाम होतो, याकडे क्रिकेट चाहत्यांचे लक्ष लागले आहे.
सुभदीप घोष यांच्याकडे नवी जबाबदारी :
गेल्या काही महिन्यांत भारतीय संघात अनेक बदल करण्यात आले. कर्णधारपदात बदल झाला, नव्या खेळाडूंना संधी देण्यात आली, मात्र त्यानंतरही संघाला सलग दोन टी-20 मालिका गमवाव्या लागल्या. या पार्श्वभूमीवर बीसीसीआयने पुन्हा एकदा सपोर्ट स्टाफमध्ये बदल करण्याचा निर्णय घेतला आहे. अनुभवी प्रशिक्षक सुभदीप घोष (Subhadeep Ghosh) यांची भारतीय संघाच्या नव्या क्षेत्ररक्षण प्रशिक्षकपदी नियुक्ती करण्यात आली आहे.
सुभदीप घोष हे टी. दिलीप (T. Dilip) यांची जागा घेणार आहेत. इंग्लंड (England) दौऱ्यानंतर टी. दिलीप यांचा कार्यकाळ संपला होता आणि तो वाढवला जाणार नसल्याचा निर्णय बीसीसीआयने घेतला. श्रीलंका दौऱ्यापासून सुभदीप घोष आपल्या नव्या भूमिकेला सुरुवात करणार असून दोन सामन्यांच्या कसोटी मालिकेत ते प्रथमच भारतीय संघासोबत काम करतील. त्यांचा कार्यकाळ 2027 च्या एकदिवसीय विश्वचषकापर्यंत राहणार असल्याचे वृत्त आहे.
Team India | अनुभवाच्या जोरावर मिळाली संधी :
आसाम येथील सुभदीप घोष यांनी आंतरराष्ट्रीय क्रिकेट खेळले नसले तरी प्रशिक्षक म्हणून त्यांच्याकडे मोठा अनुभव आहे. त्यांनी भारतीय महिला क्रिकेट संघ तसेच भारतीय 19 वर्षांखालील संघ यांचे क्षेत्ररक्षण प्रशिक्षक म्हणून काम केले आहे. यावर्षी भारतीय 19 वर्षांखालील संघाने विजेतेपद मिळवले तेव्हा तेच क्षेत्ररक्षण प्रशिक्षक होते. याशिवाय त्यांनी इंडियन प्रीमियर लीगमध्ये दिल्ली कॅपिटल्स आणि कोलकाता नाईट रायडर्स संघांसोबतही काम केले आहे. 2020 मध्ये ते राष्ट्रीय क्रिकेट अकादमीत दाखल झाले आणि 2021 मध्ये भारत ‘अ’ संघासोबत ऑस्ट्रेलिया दौऱ्यावरही क्षेत्ररक्षण प्रशिक्षक म्हणून त्यांनी जबाबदारी सांभाळली.
देशांतर्गत क्रिकेटमध्ये त्यांनी आसाम आणि रेल्वे संघांकडून 17 प्रथम श्रेणी आणि 17 लिस्ट-ए सामने खेळले असून अनुक्रमे 316 आणि 307 धावा केल्या आहेत. त्यांचा शेवटचा देशांतर्गत सामना 2005 मध्ये झाला होता. राहुल द्रविड यांच्या कार्यकाळात टी. दिलीप यांची नियुक्ती झाली होती. मात्र अलीकडील काळात भारतीय संघाच्या क्षेत्ररक्षणात सातत्याने घसरण झाल्याचे दिसून आले. आयर्लंड, इंग्लंड आणि झिम्बाब्वे दौऱ्यांदरम्यान भारतीय खेळाडूंनी एकूण 21 झेल सोडल्याने बीसीसीआयने क्षेत्ररक्षण विभागात बदल करत सुभदीप घोष यांच्यावर ही महत्त्वाची जबाबदारी सोपवली आहे.
