Taj Mahal Rename | आग्रा येथील जगप्रसिद्ध ताजमहलच्या नावाबाबत सुरू असलेल्या चर्चांवर केंद्र सरकारने अखेर स्पष्ट भूमिका मांडली आहे. संसदेत विचारलेल्या प्रश्नाला उत्तर देताना सरकारने नाव बदलण्याबाबत कोणताही प्रस्ताव नसल्याचे सांगितले. तसेच ऐतिहासिक वारसा जतन करण्यासाठी मागील दशकात मोठ्या प्रमाणात निधी खर्च केल्याची माहितीही देण्यात आली.
संसदेत सरकारची स्पष्ट भूमिका :
आग्रा (Agra) येथील ताजमहल (Taj Mahal) या ऐतिहासिक स्मारकाबाबत गेल्या काही काळापासून ‘तेजोमहालय’ (Tejo Mahalaya) या नावाच्या वादावर चर्चा सुरू होती. या पार्श्वभूमीवर संसदेत या विषयावर प्रश्न उपस्थित करण्यात आला. राज्यसभेत मार्क्सवादी कम्युनिस्ट पक्षाचे खासदार जॉन ब्रिटास (John Brittas) यांनी सरकारकडे ताजमहलचे नाव बदलण्याबाबत काही योजना आहे का, असा प्रश्न उपस्थित केला.
या प्रश्नाला उत्तर देताना केंद्रीय संस्कृती मंत्री गजेंद्र सिंह शेखावत (Gajendra Singh Shekhawat) यांनी सरकारची भूमिका स्पष्ट केली. त्यांनी सांगितले की, ताजमहलचे नाव बदलण्याचा कोणताही प्रस्ताव सध्या सरकारकडे आलेला नाही. तसेच असा कोणताही विचार सरकार करत नसल्याचे त्यांनी स्पष्ट केले. ताजमहल हे भारताच्या जागतिक पर्यटनाचे मोठे आकर्षण असून त्याचे संरक्षण आणि संवर्धन करण्यावरच सरकारचा भर असल्याचेही त्यांनी नमूद केले.
Taj Mahal Rename | ऐतिहासिक स्थळांच्या संवर्धनावर वाढलेला खर्च :
संसदेत बोलताना मंत्री शेखावत यांनी गेल्या दहा वर्षांतील सरकारच्या कामगिरीचा आढावाही मांडला. त्यांच्या मते, देशातील ऐतिहासिक स्थळांच्या शोध, उत्खनन आणि संरक्षणासाठी केंद्र सरकारने मोठ्या प्रमाणात निधी उपलब्ध करून दिला आहे. मागील सरकारच्या कालावधीच्या तुलनेत सध्याच्या काळात या क्षेत्रावर दुप्पट खर्च करण्यात आला आहे. (Taj Mahal Rename)
त्यांनी दिलेल्या माहितीनुसार 2004 ते 2014 या कालावधीत ऐतिहासिक स्थळांच्या उत्खनन आणि संवर्धनासाठी सुमारे 1,310 कोटी रुपये खर्च झाले होते. मात्र 2014 नंतरच्या काळात हा खर्च वाढून सुमारे 3,713 कोटी रुपयांपर्यंत पोहोचला आहे. देशाच्या सांस्कृतिक वारशाचे जतन करण्यासाठी कॉर्पोरेट क्षेत्रालाही या उपक्रमात सहभागी करण्याची योजना सुरू करण्यात आली असून त्याला सकारात्मक प्रतिसाद मिळत असल्याचेही त्यांनी सांगितले.
