Siya Goyal | पुण्यातील केतन अग्रवाल (Ketan Agarwal) मृत्यू प्रकरणाच्या तपासात दररोज नवे खुलासे समोर येत आहेत. या प्रकरणातील आरोपी सिया गोयल (Siya Goyal) आणि तिचा प्रियकर चेतन चौधरी (Chetan Chaudhari) यांची पोलीस चौकशी सुरू असून, त्यातून समोर आलेल्या माहितींनी या संपूर्ण घटनेला नवे वळण मिळाले आहे. पोलिसांच्या मते, हा प्रकार अचानक घडलेला नसून त्यामागे अनेक दिवसांपासून आखलेले नियोजन होते.
प्रेमसंबंधांची माहिती दिल्याचा दावा :
चौकशीदरम्यान सिया गोयल (Siya Goyal) हिने पोलिसांसमोर असा दावा केला की, तिने तिचे आणि चेतन चौधरी (Chetan Chaudhari) यांचे प्रेमसंबंध केतन अग्रवाल (Ketan Agarwal) याच्यापासून लपवले नव्हते. तिने त्याला लग्न करायचे नसल्याचे तसेच चेतनसोबत राहण्याची इच्छा असल्याचे अनेकदा सांगितल्याचे म्हटले आहे. मात्र, केतन लग्न मोडण्यास तयार नसल्याचा आरोप तिने केला. सिया म्हणाल्याचे सांगितले जाते की, लग्न रद्द करण्याच्या तिच्या भूमिकेला केतनने विरोध केला होता.
तपासात असेही समोर आले आहे की, सियाच्या कुटुंबीयांना चेतनसोबतचे तिचे नाते मान्य नव्हते. केतन आर्थिकदृष्ट्या संपन्न कुटुंबातील असल्याने या विवाहासाठी घरच्यांकडून तिच्यावर दबाव असल्याचेही तपासात नमूद करण्यात आले आहे. याच काळात सिया आणि चेतन यांनी पुढील मार्गाबाबत चर्चा सुरू ठेवली होती, अशी माहिती चौकशीतून पुढे आली आहे.
Siya Goyal | पूर्वनियोजित कटाचे धक्कादायक तपशील :
पोलीस तपासानुसार, 18 जून रोजी लोहगड (Lohagad) किल्ल्यावर घडलेल्या घटनेपूर्वी आरोपींनी एक सांकेतिक खूण निश्चित केली होती. योग्य संधी मिळाल्यानंतर सियाने ठरल्याप्रमाणे हालचाल करायची आणि त्यानंतर चेतनने कृती करायची, अशी योजना आखण्यात आल्याचे पोलिसांनी सांगितले आहे. या प्रकरणात सिया ही मुख्य सूत्रधार असल्याचा दावा पुणे ग्रामीण पोलीस (Pune Rural Police) करत आहेत.
तपासात आणखी एक महत्त्वाची बाब समोर आली असून, केतनला ठार मारण्यासाठी आरोपींनी एकाच नव्हे तर अनेक पर्यायी योजना तयार केल्या होत्या. 31 मे रोजी लोहगडावर जाऊन विशिष्ट जागेची पाहणी करण्यात आल्याचे समोर आले आहे. त्यानंतर 14 जून रोजीही प्रयत्न झाल्याचा संशय व्यक्त करण्यात येत आहे. पहिली योजना अयशस्वी ठरल्यावर 18 जून रोजी दुसरा कट राबविण्यात आला. तसेच हा प्रयत्नही फसला असता तर दुसऱ्या प्रकारे अपघात घडवून आणण्याची तयारी करण्यात आली होती, अशी माहिती तपासातून पुढे आली आहे.
