John Abraham Cricket Team | बॉलिवूडचा ‘हँडसम हंक’ जॉन अब्राहम आधीच फुटबॉल (नॉर्थईस्ट युनायटेड एफसी) आणि बाईक्सचा चाहता म्हणून प्रसिद्ध आहे, पण आता त्याने थेट क्रिकेटच्या मैदानातही मोठी खेळी खेळली आहे. तो क्रिकेटच्या मैदानातही नशीब आजमावण्यासाठी सज्ज झाला आहे. त्याने युरोपमधील आगामी ‘युरोपियन टी-२० प्रीमियर लीग’ (ETPL) मध्ये एका संघाची भागीदारी खरेदी करत थेट क्रिकेट विश्वात जाहीर प्रवेश केला आहे.
जॉन अब्राहम हा ‘रॉटरडॅम डॉकर्स’ (Rotterdam Dockers) या संघाचा सह-मालक (Co-owner) बनला आहे. या संघाच्या मालकी हक्कांमध्ये जॉन अब्राहम एकटा नसून, क्रिकेट जगतातील दिग्गज खेळाडू जॉन्टी ऱ्होड्स (Jonty Rhodes), फॅफ डु प्लेसिस (Faf du Plessis) आणि हेनरिक क्लासेन (Heinrich Klaasen) हे देखील त्याच्यासोबत या संघाचे सह-मालक आहेत.
संघाचा मालक झाल्यानंतर जॉन अब्राहम काय म्हणाला?
क्रिकेट संघाची मालकी मिळाल्यानंतर जॉन अब्राहमने आपला आनंद व्यक्त केला. तो म्हणाला, “क्रिकेटमध्ये जगभरातील लोकांना एकत्र आणण्याची आणि त्यांना प्रेरणा देण्याची एक अद्भूत शक्ती आहे. युरोपमध्ये क्रिकेटच्या विस्तारासाठी आणि लोकप्रियतेसाठी प्रचंड क्षमता आहे. आमच्या ‘रॉटरडॅम डॉकर्स’ संघात एक मजबूत नेतृत्व असून, ही फ्रँचायझी या लीगमध्ये आपले एक वेगळे स्थान निर्माण करेल यात शंका नाही.”
अभिनेता अभिषेक बच्चन आहे ‘सह-संस्थापक’
या लीगचे आणखी एक मोठे वैशिष्ट्य म्हणजे जॉनचा बॉलिवूडमधील मित्र आणि अभिनेता अभिषेक बच्चन (Abhishek Bachchan) हा या ‘युरोपियन टी-२० प्रीमियर लीग’चा (ETPL) सह-संस्थापक (Co-founder) आहे. त्यामुळे या लीगला आतापासूनच ग्लॅमर प्राप्त झाले आहे.
कधी रंगणार ही लीग? आणि कोणते दिग्गज खेळणार?
वेळापत्रक: ही बहुप्रतिक्षित युरोपियन टी-२० लीग २६ ऑगस्ट ते २० सप्टेंबर २०२६ या कालावधीत खेळवली जाणार आहे.
दिग्गजांची मांदियाळी: या लीगमध्ये केवळ क्रिकेटर्स खेळणार नाहीत, तर मार्गदर्शक आणि खेळाडू म्हणून जागतिक क्रिकेटमधील अनेक मोठे चेहरे जोडले गेले आहेत. यात मार्क वाघ (Steve Waugh), राहुल द्रविड (Rahul Dravid), ग्लेन मॅक्सवेल (Glenn Maxwell) आणि नॅथन मॅककुलम यांसारखे दिग्गज मार्गदर्शकाच्या भूमिकेत दिसू शकतात.
मैदानावर उतरणार हे खेळाडू: या लीगमध्ये प्रत्यक्ष मैदानात स्टीव्ह स्मिथ (Steve Smith), मिचेल मार्श (Mitchell Marsh) आणि भारताचा स्टार फिरकीपटू आर. अश्विन (R. Ashwin) यांसारखे दिग्गज आंतरराष्ट्रीय खेळाडू चौकार-षटकारांची आतिषबाजी करताना दिसणार आहेत.
News Title: John Abraham Cricket Team Rotterdam Dockers ETPL Cricket Owner
