Indian Railways Ticket Rules | नव्या आर्थिक वर्षाच्या सुरुवातीस रेल्वे प्रवाशांसाठी महत्त्वाचा बदल लागू होणार आहे. 1 एप्रिल 2026 पासून रेल्वे तिकीट बुकिंग आणि रद्द करण्याच्या नियमांमध्ये सुधारणा करण्यात आली आहे. या नव्या नियमांची माहिती नसल्यास प्रवाशांना आर्थिक नुकसान सहन करावे लागू शकते. त्यामुळे रेल्वे प्रवास करणाऱ्यांनी तिकीट रद्द करण्याच्या सुधारित नियमांची माहिती घेणे आवश्यक ठरणार आहे.
तिकीट कॅन्सलेशनसाठी नव्या अटी :
भारतीय रेल्वे (Indian Railways)ने तिकीट रद्द करण्याच्या धोरणात बदल जाहीर केला आहे. यानुसार आता प्रवाशांना त्यांच्या ट्रेनच्या सुटण्याच्या वेळेपूर्वी किमान 8 तास आधी तिकीट रद्द करणे आवश्यक राहणार आहे. जर प्रवाशांनी या कालावधीनंतर तिकीट कॅन्सल करण्याचा प्रयत्न केला, तर त्यांना कोणताही परतावा मिळणार नाही. त्यामुळे प्रवास रद्द करण्याचा निर्णय वेळेत घेणे महत्त्वाचे ठरणार आहे.
पूर्वीच्या नियमांनुसार ट्रेन सुटण्याच्या 4 तासांपूर्वी तिकीट रद्द केल्यास काही प्रमाणात पैसे परत मिळत होते. मात्र नव्या नियमांनुसार ही मुदत वाढवून 8 तास करण्यात आली आहे. त्यामुळे अनेक प्रवाशांना आधीपेक्षा लवकर तिकीट रद्द करण्याचा निर्णय घ्यावा लागेल. विशेष म्हणजे एकाच वेळी कुटुंबातील अनेक सदस्यांसाठी तिकीट आरक्षित केले असले तरीही हा नियम सर्व तिकिटांवर लागू राहणार आहे.
Indian Railways Ticket Rules | रिफंडसाठी निश्चित कालावधी :
नव्या धोरणानुसार तिकीट रद्द केल्यावर मिळणाऱ्या रिफंडची रचना देखील स्पष्ट करण्यात आली आहे. जर प्रवाशांनी ट्रेन सुटण्याच्या 8 ते 24 तास आधी तिकीट रद्द केले, तर त्यांना तिकिटाच्या रकमेपैकी सुमारे 50 टक्के परतावा मिळू शकतो. तसेच 24 ते 72 तासांच्या आत तिकीट रद्द केल्यास प्रवाशांना जवळपास 75 टक्के रिफंड मिळणार आहे.
याव्यतिरिक्त, ट्रेन सुटण्याच्या 72 तासांपेक्षा आधी तिकीट रद्द केल्यास पूर्ण रक्कम परत मिळण्याची तरतूद करण्यात आली आहे. त्यामुळे प्रवास रद्द करण्याची शक्यता असल्यास शक्य तितक्या लवकर तिकीट कॅन्सल करणे फायदेशीर ठरेल. 1 एप्रिल 2026 पासून लागू होणाऱ्या या नव्या नियमांमुळे रेल्वे प्रवासाशी संबंधित प्रक्रिया अधिक स्पष्ट होणार असली तरी प्रवाशांनी वेळेचे भान ठेवणे अत्यावश्यक ठरणार आहे.
