Pydhonie family death case | मुंबई (Mumbai) मधील पायधुणी (Pydhonie) परिसरात एकाच कुटुंबातील चार सदस्यांचा झालेला संशयास्पद मृत्यू हा अपघाती नसून विषबाधेमुळे झाल्याचे आता स्पष्ट झाले आहे. सुरुवातीला कलिंगड खाल्ल्यामुळे हा मृत्यू झाल्याचा संशय व्यक्त केला जात होता, मात्र वैद्यकीय तपासणीत धक्कादायक वास्तव समोर आले आहे. या कुटुंबाच्या शरीरात उंदीर मारण्यासाठी वापरल्या जाणाऱ्या औषधाचे अंश सापडले आहेत.
वैद्यकीय अहवालातून धक्कादायक खुलासा
डोकाडिया कुटुंबातील (Dokadia Family) चौघांच्या मृतदेहांच्या तपासणीनंतर त्यांच्या शरीरात ‘झिंक फॉस्फाईट’ (Zinc Phosphide) या विषारी घटकाचे अंश आढळून आले आहेत. हे रसायन प्रामुख्याने उंदीर मारण्याच्या औषधामध्ये वापरले जाते. कलिना (Kalina) येथील फॉरेन्सिक सायन्स लॅबोरेटरी (FSL) मधील तज्ज्ञांनी केलेल्या सखोल चाचण्यांनंतर हा निष्कर्ष काढण्यात आला आहे.
मिळालेल्या माहितीनुसार, या विषारी घटकामुळेच कुटुंबातील सदस्यांना उलट्या आणि मळमळीचा त्रास सुरू झाला होता. शरीरात विष पसरल्याने त्यांची प्रकृती वेगाने खालावली आणि अवघ्या काही तासांतच चौघांचाही अंत झाला. महत्त्वाचे म्हणजे, त्यांनी खाल्लेल्या कलिंगडाच्या नमुन्यांमध्येही या विषारी औषधाचे अस्तित्व असल्याचे प्रयोगशाळेतील अहवालात नमूद करण्यात आले आहे.
घटनेचा घटनाक्रम आणि पोलीस तपास
२५ एप्रिल रोजी रात्री अब्दुल्ला डोकाडिया (Abdullah Dokadia – ४४), त्यांची पत्नी नसरीन (Nasreen – ३५) आणि मुली आयेशा (Ayesha – १६) व झैनब (Zainab – १३) यांनी एकत्र कलिंगड खाल्ले होते. त्यानंतर २६ एप्रिल रोजी त्यांना त्रास सुरू झाला आणि त्यांना जे.जे. रुग्णालय (JJ Hospital) येथे दाखल करण्यात आले. तिथे उपचारादरम्यान एकामागून एक अशा चौघांचाही मृत्यू झाला, ज्यामुळे संपूर्ण परिसरात खळबळ उडाली होती.
आता हे विष त्यांच्या शरीरात नेमके कसे गेले, याचा तपास पोलीस करत आहेत. हे कृत्य आत्महत्येचा प्रकार आहे की कोणी जाणीवपूर्वक त्यांच्या अन्नात विष कालवले होते, या दिशेने पायधुणी पोलीस तपास करत आहेत. ११ दिवसांच्या प्रतिक्षेनंतर या प्रकरणाचा तांत्रिक छडा लागला असला, तरी यामागील नेमके कारण शोधण्याचे आव्हान आता प्रशासनासमोर आहे.
News title: Pydhonie family death case solved Zinc Phosphide found
