Maharashtra Rain Alert | श्रावणाच्या मध्यावर महाराष्ट्रातील वातावरण पुन्हा बदलताना दिसत आहे. ऑगस्टच्या सुरुवातीला पावसाने काही प्रमाणात विश्रांती घेतल्यानंतर आता अनेक भागांत पुन्हा पावसाच्या सरी सुरू झाल्या आहेत. 25 ऑगस्ट रोजी राज्यातील काही जिल्ह्यांमध्ये जोरदार ते मुसळधार पावसाचा अंदाज असून, हवामान विभागाने पुढील 24 तासांसाठी 11 जिल्ह्यांना यलो अलर्ट दिला आहे.
घाटमाथा आणि मराठवाड्यात पावसाचा जोर :
पश्चिम महाराष्ट्रातील घाट परिसरात पावसाची तीव्रता वाढण्याची शक्यता आहे. पुणे (Pune), सातारा (Satara) आणि कोल्हापूर (Kolhapur) जिल्ह्यांच्या घाटमाथ्यावर काही ठिकाणी जोरदार, तर काही भागांत मुसळधार पाऊस होण्याचा अंदाज वर्तवण्यात आला आहे. त्यामुळे या भागासाठी हवामान विभागाकडून यलो अलर्ट जारी करण्यात आला आहे. ऑगस्टच्या सुरुवातीपासून पावसाने काही भागांत उघडीप घेतल्याने जोरदार पावसाची प्रतीक्षा करणाऱ्या नागरिक आणि शेतकऱ्यांसाठी ही स्थिती महत्त्वाची ठरणार आहे.
अहिल्यानगर, पुणे, सातारा, सांगली (Sangli) आणि सोलापूर (Solapur) जिल्ह्यांत हलक्या ते मध्यम स्वरूपाच्या सरी पडण्याची शक्यता आहे. काही ठिकाणी पावसासोबत विजांचा कडकडाट आणि वादळी स्थिती निर्माण होऊ शकते. विशेषतः घाटमाथ्यावर प्रवास करणाऱ्यांनी हवामानातील अचानक बदल लक्षात घेऊन काळजी घेण्याचे आवाहन करण्यात आले आहे. दुसरीकडे, मराठवाड्यातील छत्रपती संभाजीनगर, जालना, परभणी (Parbhani) आणि नांदेड या चार जिल्ह्यांनाही यलो अलर्ट देण्यात आला आहे.
Maharashtra Rain Alert | विदर्भातही पावसाची शक्यता; कोकणात विश्रांती
मराठवाड्यातील या चार जिल्ह्यांमध्ये तुरळक ठिकाणी विजांच्या कडकडाटासह हलका ते मध्यम वादळी पाऊस पडण्याची शक्यता आहे. काही भागांत वाऱ्याचा वेग ताशी 30 ते 40 किलोमीटरपर्यंत पोहोचू शकतो. त्यामुळे नागरिकांनी सतर्क राहण्याची गरज आहे. सर्वच भागांत पावसाचा जोर राहणार नसला तरी वातावरणातील हा बदल शेतकऱ्यांसाठी काहीसा दिलासा देणारा ठरू शकतो. राज्यात पुन्हा पावसाची सक्रियता वाढण्याची चिन्हे दिसत आहेत.
विदर्भातील चंद्रपूर, गडचिरोली, गोंदिया आणि नागपूर जिल्ह्यांनाही यलो अलर्ट देण्यात आला आहे. येथे हलका ते मध्यम पाऊस अपेक्षित असून, काही ठिकाणी जोरदार सरी येऊ शकतात. मात्र अकोला, अमरावती, भंडारा (Bhandara), बुलढाणा (Buldhana), वर्धा, वाशिम (Washim) आणि यवतमाळ (Yavatmal) जिल्ह्यांसाठी सध्या कोणताही विशेष अलर्ट नाही. तरी पुढील एक-दोन दिवसांत या भागांत काही ठिकाणी पावसाच्या सरी पडू शकतात.
