Ladki Bahin Yojana | मुख्यमंत्री माझी लाडकी बहीण योजनेतील लाभार्थी महिलांसाठी महत्त्वाची अपडेट समोर आली आहे. सामाजिक न्याय विभागाकडील 344 कोटी रुपयांचा निधी महिला व बालविकास विभागाकडे हस्तांतरित करण्यात आला आहे. त्यानंतर पात्र महिलांच्या खात्यात जुलै महिन्याच्या 1,500 रुपयांच्या हप्त्याची रक्कम जमा होण्याची प्रक्रिया सुरू झाली आहे. रक्षाबंधनाच्या पार्श्वभूमीवर या निर्णयामुळे महिलांना दिलासा मिळाला आहे.
जुलैचा 1,500 रुपयांचा हप्ता :
राज्य सरकारच्या मुख्यमंत्री माझी लाडकी बहीण योजनेत पात्र महिलांना दर महिन्याला 1,500 रुपयांची आर्थिक मदत दिली जाते. जुलै महिन्याचा हप्ता रखडल्याने लाभार्थी महिलांचे लक्ष सरकारच्या पुढील निर्णयाकडे होते. आता सामाजिक न्याय विभागाचा 344 कोटी रुपयांचा निधी महिला व बालविकास विभागाकडे वळवण्यात आल्यानंतर जुलैच्या हप्त्याचे पैसे पात्र महिलांच्या बँक खात्यात जमा होण्यास सुरुवात झाली आहे.
रक्षाबंधनाच्या आधी जुलैचा हप्ता मिळत असल्याने लाभार्थी महिलांमध्ये समाधान व्यक्त होत आहे. मात्र, प्रत्येक महिलेला हा लाभ मिळण्यासाठी तिचे नाव अंतिम पात्र लाभार्थी यादीत असणे आवश्यक आहे. त्यासोबतच योजनेसाठी निश्चित करण्यात आलेल्या सर्व अटींची पूर्तता झालेली असणे गरजेचे आहे.
Ladki Bahin Yojana | लाभार्थी संख्येत 92 लाखांची घट :
लाडकी बहीण योजना सुरू झाली तेव्हा राज्यात जवळपास 2 कोटी 47 लाख महिला या योजनेच्या लाभार्थी होत्या. त्यानंतर सरकारने लाभार्थींची पडताळणी करण्यासाठी ई-केवायसी प्रक्रिया राबवली. या प्रक्रियेत अनेक महिलांनी ई-केवायसी पूर्ण केली नाही. परिणामी सुमारे 62 लाख महिलांची नावे लाभार्थी यादीतून कमी करण्यात आली. इतर कारणांमुळेही लाभार्थींच्या संख्येत घट झाली आहे.
ई-केवायसी तसेच इतर पडताळणीनंतर आता योजनेतील पात्र लाभार्थी महिलांची संख्या सुमारे 1 कोटी 65 लाख इतकी राहिली आहे. म्हणजेच योजना सुरू झाल्याच्या तुलनेत लाभार्थी संख्येत जवळपास 92 लाखांची घट झाली आहे. सरकारकडून यादीची छाननी करून पात्र महिलांनाच योजनेचा लाभ दिला जात आहे. त्यामुळे जुलैचा हप्ता कोणाला मिळणार, याकडे लाभार्थी महिलांचे लक्ष आहे. दरम्यान, पात्र महिलांनी त्यांच्या बँक खात्यात 1,500 रुपयांची रक्कम जमा झाली आहे का, हे तपासण्याचे आवाहन करण्यात आले आहे.
