Pune Metro | पुणे शहरातील प्रवाशांसह हिंजवडी (Hinjewadi) आयटी परिसरात काम करणाऱ्या लाखो कर्मचाऱ्यांसाठी महत्त्वाची अपडेट समोर आली आहे. हिंजवडी ते शिवाजीनगर (Shivajinagar) या बहुप्रतीक्षित मेट्रो मार्गाच्या उद्घाटनाची तारीख निश्चित झाली आहे. सप्टेंबरच्या पहिल्या आठवड्यात पंतप्रधान नरेंद्र मोदी (Narendra Modi) ऑनलाइन पद्धतीने या सेवेला हिरवा झेंडा दाखवणार आहेत. त्यामुळे या मार्गावरील प्रतीक्षा लवकरच संपणार आहे.
माण-बालेवाडी पहिल्या टप्प्यात मेट्रो धावणार :
हिंजवडी आयटी पार्कला पुण्याच्या मध्यवर्ती भागाशी जोडणाऱ्या या महत्त्वाच्या मेट्रो प्रकल्पाचे काम दोन टप्प्यांत पूर्ण करून सेवा सुरू केली जाणार आहे. पहिल्या टप्प्यात माण स्थानकापासून आर. के. लक्ष्मण संग्रहालय, बालेवाडी येथील स्थानकापर्यंत मेट्रो धावेल. त्यानंतर दुसऱ्या टप्प्यात बाणेर हायस्ट्रीट ते शिवाजीनगर हा मार्ग प्रवाशांसाठी खुला केला जाणार आहे. त्यामुळे हिंजवडी परिसरातून शहराच्या मध्यभागाकडे जाणाऱ्या प्रवाशांना सार्वजनिक वाहतुकीचा आणखी एक पर्याय उपलब्ध होईल.
माण ते बालेवाडी या पहिल्या टप्प्यात एकूण 12 स्थानके आहेत. या मार्गावर प्रवासी सेवा सुरू करण्यासाठी मेट्रो रेल्वे सुरक्षा आयुक्त (CMRS) यांनी 23 जुलै रोजी आवश्यक मंजुरी दिली होती. तांत्रिक तपासणी, विविध चाचण्या आणि सुरक्षा निकषांची पूर्तता झाल्यानंतर ही परवानगी देण्यात आली. त्यामुळे संबंधित मार्गावर मेट्रो ताशी 80 किलोमीटरपर्यंतच्या कमाल वेगाने धावण्यास तयार आहे. सुरक्षा मंजुरी मिळाल्यानंतर पुणे महानगर प्रदेश विकास प्राधिकरणाने (PMRDA) राज्य सरकारशी पत्रव्यवहार करून सेवा सुरू करण्यासाठी उद्घाटनाची तारीख निश्चित करण्याची विनंती केली होती.
Pune Metro | पंतप्रधान मोदींच्या हस्ते ऑनलाइन उद्घाटन :
पुण्यात आतापर्यंत सुरू करण्यात आलेल्या मेट्रोच्या विविध टप्प्यांच्या उद्घाटनाची जबाबदारी पंतप्रधान नरेंद्र मोदी यांच्याकडेच राहिली आहे. यापूर्वीच्या टप्प्यांनाही त्यांनी हिरवा झेंडा दाखवला होता. त्यामुळे हिंजवडी-शिवाजीनगर हा महत्त्वाचा मार्ग सुरू करतानाही पंतप्रधानांच्या हस्तेच उद्घाटन व्हावे, अशी भूमिका मुख्यमंत्री कार्यालयाने घेतली होती. याच पार्श्वभूमीवर पंतप्रधान कार्यालयाशी संपर्क साधून उद्घाटनासाठी त्यांच्या वेळेची मागणी करण्यात आली होती.
पंतप्रधानांच्या व्यस्त कार्यक्रमामुळे या सेवेला प्रत्यक्ष सुरू होण्यासाठी काही दिवसांचा विलंब झाला, अशी माहिती देण्यात आली. मात्र आता राज्य सरकारने सप्टेंबरच्या पहिल्या आठवड्यातील एक दिवस उद्घाटनासाठी निश्चित केला आहे. पंतप्रधान मोदी ऑनलाइन माध्यमातून या मेट्रो सेवेचे लोकार्पण करणार आहेत. पुणे महानगर प्रदेश विकास प्राधिकरणाचे आयुक्त डॉ. अभिजित चौधरी यांनीही नागरिकांची गैरसोय कमी करण्यासाठी हा मार्ग शक्य तितक्या लवकर कार्यान्वित करणे हे प्राधान्य असल्याचे स्पष्ट केले आहे. मेट्रो सुरू झाल्यानंतर हिंजवडी परिसरातील वाहतूक कोंडीचा प्रश्न काही प्रमाणात कमी होण्यास मदत होईल, अशी अपेक्षा आहे. विशेषतः आयटी क्षेत्रातील कर्मचाऱ्यांना रोजच्या प्रवासासाठी या सेवेचा मोठा फायदा होण्याची शक्यता आहे.
News title : Hinjewadi-Shivajinagar Metro Launch Soon
