Pune | पुणे महापालिकेने (Pune Municipal Corporation) नागरिकांना पाण्याच्या वापरावर नियंत्रण ठेवण्याचा इशारा दिला असून, जास्त पाणी वापरणाऱ्या सोसायट्यांचे नळ कनेक्शन तोडण्यात येणार असल्याचा इशारा दिला आहे. पाण्याचा अपव्यय रोखण्यासाठी प्रशासनाने हे कठोर पाऊल उचलले आहे.
जलमापक प्रणालीमधून अपव्ययाचा उलगडा
पुणे (Pune) शहरात लागू असलेल्या समान पाणी योजनेच्या अंतर्गत 141 झोन तयार करण्यात आले आहेत. या योजनेचा भाग म्हणून, 47 झोन पूर्ण झाले असून 41 झोनमध्ये जलमापक (metering) प्रणालीद्वारे पाण्याची अचूक मोजणी केली जात आहे. यामध्ये मुख्य जलटाकीतून सोडलेले आणि सोसायटीच्या टाकीत पोहोचलेले पाणी यामधील फरक नोंदवला जातो.
महापालिकेला प्राप्त झालेल्या अहवालानुसार काही सोसायट्यांमध्ये अपेक्षेपेक्षा अधिक म्हणजेच शेकडो लिटर पाणी अधिक वापरले जात आहे. यामुळे प्रशासनाने हे प्रकार गंभीरतेने घेत, पाणी अपव्यय करणाऱ्यांविरुद्ध थेट कारवाईचा इशारा दिला आहे.
दररोजच्या वापरावर ठरवलेली मर्यादा
शहरात प्रत्येक व्यक्तीसाठी दररोज 135 लिटर पाणी वापरण्याची मर्यादा ठरवण्यात आली आहे. मात्र, काही सोसायट्यांमध्ये हा वापर 500 ते 600 लिटर इतका अधिक असल्याचे महापालिकेच्या निरीक्षणात आल्याने या मर्यादेचे उल्लंघन करणाऱ्यांवर थेट नळजोडणी तोडण्याची कारवाई होणार आहे.
या पार्श्वभूमीवर पुण्यात (Pune) पाणीकपात सुरू करण्यात आली आहे. कारण शहराला पाणीपुरवठा करणाऱ्या धरणांमधील साठा मर्यादित आहे. जरी सध्या पाणीसाठा स्थिर असला तरी, पुढील पावसाळा सुरू होईपर्यंत पाण्याचा ताण वाढण्याची शक्यता आहे. म्हणूनच, पाण्याचा अपव्यय करणाऱ्या सोसायट्यांवर कठोर पावले उचलण्याचा निर्णय घेण्यात आला आहे.
