Pune Navale Bridge | पुण्यातील नवले पुलावरील अपघातांचे सत्र पुन्हा एकदा सुरु झाले आहे. शहरातील सर्वात धोकादायक ‘ब्लॅक स्पॉट’ म्हणून ओळखल्या जाणाऱ्या या ठिकाणी आज सकाळी आणखी एक अपघात घडला. 8 डिसेंबरच्या सकाळी स्कूल बसने पंच कारला दिलेल्या धडकेत दोन जण जखमी (school bus hits car) झाले असून त्यांना तत्काळ रुग्णालयात हलवण्यात आले. या घटनेमुळे नवले पुलावरील सुरक्षाविषयक उपाययोजनांबाबतचा प्रश्न पुन्हा एकदा ऐरणीवर आला आहे.
प्रत्यक्षदर्शींच्या माहितीनुसार, सकाळी नवले पुलावरून जात असलेल्या स्कूल बसचालकाचा ताबा सुटला आणि बसने समोरून जाणाऱ्या पंच कारला जोरदार धडक दिली. धडक इतकी तीव्र होती की कारचा मागील भाग अक्षरशः चिरडला गेला. कारमधील दोन्ही प्रवासी जखमी झाले असून त्यांची प्रकृती आता स्थिर आहे. सुदैवाने बसमध्ये विद्यार्थी नसल्यामुळे मोठी दुर्घटना टळली. (Pune Navale Bridge)
स्कूल बसने पंच कारला दिली जोरदार धडक :
मिळालेल्या माहितीनुसार, बसचालकाच्या हलगर्जीपणामुळे कारला मागून जोरदार धडक बसली. धडकेनंतर कारचा मागील भाग पूर्णपणे नष्ट झाला होता. स्थानिक नागरिकांनी तत्काळ मदत करून जखमींना रुग्णालयात दाखल केले. पोलिसांनी घटनास्थळी धाव घेत वाहतूक सुरळीत केली. हा अपघात किरकोळ असला तरी या परिसरातील वारंवार होणाऱ्या दुर्घटनांनी लोकांमध्ये भीतीचं वातावरण निर्माण झालं आहे.
नवले पुलावर (Navle Bridge) सतत घडणाऱ्या अपघातांमागे रस्त्याची धोकादायक रचना हे एक प्रमुख कारण असल्याचे तज्ज्ञ सांगतात. नव्या कात्रज बोगद्याकडून येताना असलेला 4.3 टक्क्यांचा तीव्र उतार वाहनांचा वेग अचानक वाढवतो. अनेकदा चालकांचा वाहनावरील ताबा सुटून थेट पुलाच्या दिशेने अपघात घडतो. हा रस्ता पुण्यातील 19 ब्लॅक स्पॉटपैकी सर्वात धोकादायक म्हणून वारंवार समोर आला आहे.
Pune Navale Bridge | नवले पूल हा मृत्यूचा सापळा म्हणून वाढली भीती :
काही दिवसांपूर्वीच 13 नोव्हेंबर रोजी झालेल्या भीषण अपघातात आठ जणांचा मृत्यू झाला होता. त्यानंतरही चार ते पाच वाहनांच्या साखळी धडकेचे प्रकार घडले. वारंवार होणाऱ्या या दुर्घटनांमुळे स्थानिकांमध्ये आणि वाहनचालकांमध्ये मोठी चिंता पसरली आहे. सुरक्षेसाठी कायमस्वरूपी उपाययोजना करण्याची मागणी नागरिकांकडून होत आहे. (Pune Navale Bridge)
नवले पुलावर दिवसेंदिवस वाढणारी वाहतूक, उताराचा तीव्रपणा आणि वेगाने येणारी वाहने यामुळे हा परिसर मृत्यूसंभाव्य बनला आहे. या मार्गावर प्रवास करणारे नागरिक नेहमीच धास्तावलेले दिसतात. प्रशासनाने अनेकदा घोषणाबाजी केली असली तरी प्रत्यक्षात ठोस निर्णय किंवा बदल झालेले दिसत नाहीत.
