Pune–Nashik Highway | पुणे-नाशिकदरम्यान प्रवास करणाऱ्यांसाठी दिलासादायक बातमी आहे. शहरातील वाढत्या वाहतूक कोंडीला पर्याय म्हणून पुणे-नाशिक महामार्गावर एलिव्हेटेड कॉरिडॉर उभारण्याचा ‘मेगा प्लॅन’ तयार करण्यात आला आहे. नाशिक फाटा ते राजगुरुनगर (खेड) या 28 किमी मार्गावर हा उन्नत रस्ता होणार असून सध्या दीड ते दोन तासांचा प्रवास अवघ्या 20 मिनिटांत पूर्ण होईल, अशी माहिती पुणे महानगर प्रदेश विकास प्राधिकरण (PMRDA) यांनी दिली. (Pune–Nashik Highway)
या एलिव्हेटेड कॉरिडॉरमुळे महामार्गावरील सिग्नल-क्रॉसिंग्स आणि औद्योगिक पट्ट्यातील अडथळ्यांना बायपास मिळेल. परिणामी मालवाहतूक जलद होईल, इंधन-बचत होईल आणि प्रवासाचा खर्च कमी होईल. प्रकल्प राबविताना वाहतुकीतील सुरक्षेला प्राधान्य देऊन रॅम्प, इंटरचेंज आणि सेवा रस्ते टप्प्याटप्प्याने विकसित केले जाणार आहेत.
भूसंपादनाची गती आणि चाकणसाठी पर्यायी बायपास :
कॉरिडॉर उभारणीसाठी खेड तालुक्यातील नाणेकरवाडी, मेदनकरवाडी, वाकी खुर्द, वाकी बुद्रुक, चिंबळी, कुरुळी आणि चाकण येथे भूसंपादन प्रक्रिया सुरू होणार आहे. चाकण शहरातील वाहतूक कोंडी टाळण्यासाठी मेदनकरवाडी, कडाची वाडी, नाणेकरवाडी आणि खराबवाडी येथील जमिनींचे भूसंपादन करून पर्यायी बायपास तयार केला जाणार आहे. महानगर आयुक्त डॉ. योगेश म्हसे यांनी तातडीने मोजणी पूर्ण करून भूसंपादन गतिमान करण्याचे निर्देश दिले आहेत. (Pune–Nashik Highway)
या निर्णयामुळे एमआयडीसी पट्ट्यातील औद्योगिक वाहतुकीला दिलासा मिळेल. भारी वाहनांना थेट एलिव्हेटेड मार्गाचा पर्याय उपलब्ध झाल्याने स्थानिक रस्त्यांवरील दबाव कमी होईल आणि अपघातांचे प्रमाणही घटेल, अशी अपेक्षा आहे. स्थानिकांना पुनर्वसन आणि भरपाई प्रक्रियेसंदर्भात पारदर्शक कार्यपद्धती राबविली जाणार असल्याचे प्रशासनाचे संकेत आहेत.
Pune–Nashik Highway | रिंग रोड प्रकल्पाची प्रगती : चार टप्प्यांवर आढावा :
पुणे शहराला जोडणाऱ्या रिंग रोडच्या भूसंपादनावरही बैठकीत चर्चा झाली. पहिल्या टप्प्यात नाशिक महामार्ग–अहिल्यानगर रस्ता दरम्यानच्या सोलू, सोलू इंटरचेंज, वडगाव शिंदे आणि निरगुडी या गावांची मोजणी पूर्ण झाली असून भूसंपादन अंतिम टप्प्यात आहे. दुसऱ्या टप्प्यात अहिल्यानगर महामार्ग–सोलापूर महामार्ग दरम्यान आंबेगाव खुर्द आणि भिलारेवाडीची संयुक्त मोजणी पूर्ण झाली आहे. (Pune–Nashik Highway)
तिसऱ्या आणि चौथ्या टप्प्यात सोलापूर रस्ता–सातारा रस्ता आणि सातारा रस्ता–पौड रस्ता या दरम्यानच्या भूसंपादन प्रक्रियेवरही तपशीलवार चर्चा झाली. PMRDA कार्यालयात महानगर आयुक्त डॉ. योगेश म्हसे आणि जिल्हाधिकारी जितेंद्र डुडी यांच्या उपस्थितीत विविध विभागांच्या संयुक्त बैठकीत हे निर्णय घेण्यात आले. शहरातील वाहतूक कोंडी कमी करण्यासाठी एलिव्हेटेड कॉरिडॉर आणि रिंग रोड हे दोन्ही प्रकल्प निर्णायक ठरणार आहेत.
