Pune Murder | पुण्यात गुन्हेगारीचे सत्र काही केल्या थांबताना दिसत नाही. काही दिवसांपूर्वीच शहरात एका युवकाचा खून झाल्यानंतर पुणे अजून सावरतही नाही, तोच पुन्हा एकदा दिवसाढवळ्या खुनाची धक्कादायक घटना उघडकीस आली आहे. सिंहगड कॉलेज (Singhgad College) परिसरात एका इमारतीजवळ घडलेल्या या घटनेमुळे परिसरात भीतीचे वातावरण निर्माण झाले आहे. शहरातील सुरक्षेवर पुन्हा मोठे प्रश्नचिन्ह उपस्थित झाले आहे.
मिळालेल्या माहितीनुसार, एका तरुणावर कोयता आणि कुंडीच्या सहाय्याने हल्ला करण्यात आला. आरोपींनी निर्घृण मारहाण करत घटनास्थळीच त्याची हत्या केली. पुण्यासारख्या शिक्षणनगरीत अशी घटना दिवसाढवळ्या घडल्याने नागरिक संतापले असून पोलिसांनी तातडीने पथक रवाना केले आहे. घटनास्थळावर मोठी गर्दी जमल्याचेही सांगितले जात आहे.
हत्येत वापरले कोयता आणि कुंडी; पोलिसांची धावपळ :
या हल्ल्यात कोयत्याचा वापर केल्याचे स्पष्ट झाले असून, त्यासोबत लोखंडी कुंड्याने मारहाण केल्याची माहिती समोर येत आहे. हल्ला इतका अचानक आणि वेगात झाला की आजूबाजूचे लोक काही समजूनही घेऊ शकले नाहीत. आरोपींनी तरुणाला नकळत लक्ष्य केले की त्यांच्यात काही वाद होता? हे अजून स्पष्ट झालेले नाही. मात्र हत्येची पद्धत पाहता हा नियोजित हल्ला असल्याची शक्यता तपासली जात आहे.
खून झालेल्या तरुणाचे नाव सय्यद असल्याचे पोलिसांनी प्राथमिक तपासात सांगितले आहे. त्याचे वय अंदाजे 20 वर्षांपेक्षा कमी असल्याची माहिती मिळाली आहे. तरुण वयात अशा पद्धतीने जीव गमवावा लागल्याने पालक आणि परिसरातील नागरिकांमध्ये संतापाचा सुर आहे. घटनास्थळी पंचनामा सुरू असून पोलिसांकडून सीसीटीव्ही फुटेज तपासले जात आहेत.
Pune Murder | सिंहगड कॉलेज परिसरात वाढत्या गुन्ह्यांबाबत चिंता :
सिंहगड रोड आणि कॉलेज परिसरात गेल्या काही महिन्यांत गुन्हेगारीचे प्रमाण वाढताना दिसत आहे. विद्यार्थ्यांची मोठी वर्दळ, भाड्याच्या रूम्स, गर्दीचे रस्ते आणि उशिरापर्यंत सुरू राहणारी वर्दळ यामुळे हा परिसर पोलिसांसाठी आव्हानात्मक बनला आहे. काही दिवसांतच सलग दुसरा खून घडल्याने स्थानिक नागरिकांनी सुरक्षा वाढवण्याची मागणी केली आहे.
या प्रकरणाचा तपास सुरू असून आरोपींची ओळख पटवण्यासाठी पोलिसांकडून विशेष पथक तयार करण्यात आले आहे. हत्या नेमकी कोणत्या कारणाने झाली, आरोपी किती जण होते आणि त्यांचा मृत तरुणाशी काय संबंध होता, याकडे सर्वांचे लक्ष लागले आहे. पुणे पोलिसांनी हा गुन्हा गंभीर स्वरूपाचा मानून तपास वेगाने सुरू केल्याचे सांगितले आहे.
