Price Hike | नवीन आर्थिक वर्षाची सुरुवात सर्वसामान्यांसाठी महागडी ठरण्याची शक्यता आहे. 1 एप्रिलपासून अनेक महत्त्वाच्या वस्तूंच्या किमती वाढणार असल्याची माहिती समोर आली आहे. वाहनांपासून ते घरगुती इलेक्ट्रॉनिक्स वस्तूंपर्यंत अनेक उत्पादनांच्या दरात वाढ होणार असल्यामुळे ग्राहकांच्या खिशावर मोठा परिणाम होऊ शकतो.
जागतिक बाजारातील परिस्थिती, कच्च्या मालाच्या वाढलेल्या किमती आणि वाहतूक खर्चात झालेली वाढ यामुळे कंपन्यांनी दरवाढीचा निर्णय घेतल्याचे सांगितले जात आहे. त्यामुळे कार, टीव्ही, फ्रीज आणि एअर कंडिशनर यांसारख्या वस्तूंच्या किमती 5 ते 10 टक्क्यांपर्यंत वाढण्याची शक्यता व्यक्त केली जात आहे.
कच्च्या मालाच्या किमतीमुळे वाढणार खर्च :
प्लास्टिक, रेझिन आणि पॉलिमर यांसारख्या कच्च्या मालाच्या किमतीत मोठी वाढ झाली आहे. या घटकांचा वापर मोठ्या प्रमाणावर इलेक्ट्रॉनिक्स उत्पादनांमध्ये होत असल्यामुळे उत्पादन खर्च वाढला आहे. याशिवाय आंतरराष्ट्रीय बाजारात मालवाहतुकीच्या दरातही लक्षणीय वाढ झाली आहे.
माहितीनुसार जागतिक स्तरावर मालवाहतूक खर्च सुमारे 7 ते 10 टक्क्यांनी वाढला आहे. त्यातच अमेरिकन डॉलरच्या तुलनेत भारतीय रुपयाचे मूल्य सुमारे 2 टक्क्यांनी घसरल्याने आयात होणाऱ्या वस्तूंच्या किमती आणखी वाढल्या आहेत. त्यामुळे कंपन्यांना उत्पादन आणि वितरणाचा वाढलेला खर्च ग्राहकांवर टाकावा लागत आहे.
Price Hike | वाहन आणि घरगुती उपकरणेही महागणार :
वाहन खरेदी करण्याचा विचार करणाऱ्या ग्राहकांना आता अधिक खर्च करावा लागणार आहे. लक्झरी कार निर्मिती करणाऱ्या Mercedes‑Benz आणि Audi यांनी 1 एप्रिलपासून वाहनांच्या किमतीत सुमारे 2 टक्क्यांची वाढ करण्याची घोषणा केली आहे. इतर अनेक कार उत्पादक कंपन्याही आपल्या वाहनांच्या किमती 2 ते 3 टक्क्यांनी वाढवण्याच्या तयारीत असल्याची माहिती आहे.
केवळ वाहनांच्याच नव्हे तर घरगुती उपकरणांच्या किमतीतही वाढ होणार आहे. टीव्ही, फ्रीज आणि एअर कंडिशनर यांसारख्या वस्तू 5 ते 6 टक्क्यांनी महाग होऊ शकतात. तसेच शूज आणि सिंथेटिक फायबरपासून बनवलेले कपडे 9 ते 10 टक्क्यांनी महागण्याची शक्यता व्यक्त केली जात आहे. घरात वापरल्या जाणाऱ्या डेकोरेटिव्ह पेंटच्या किमतीतही वाढ होणार असल्यामुळे नवीन आर्थिक वर्षाच्या सुरुवातीलाच ग्राहकांना महागाईचा मोठा फटका बसू शकतो.
