Pimpri-Chinchwad | ऐन बहरात असलेला संसार आणि पोटच्या मुला-बाळांना सोडून घरातून निघून जाणाऱ्या विवाहित महिलांचे वाढते प्रमाण पिंपरी-चिंचवड (Pimpri-Chinchwad) पोलीस आयुक्तालय हद्दीत चिंतेचा विषय बनले आहे. जानेवारी २०२४ ते फेब्रुवारी २०२५ या केवळ १४ महिन्यांच्या कालावधीत शहरातून बेपत्ता झालेल्या महिलांपैकी ८४० महिलांचा अद्याप शोध लागलेला नाही. “साहेब, आता शोधू कुठे तिला मी..?” असा आर्त सवाल करत या महिलांचे कुटुंबीय पोलीस ठाण्यांच्या पायऱ्या झिजवत आहेत.
घर सोडण्यामागील कारणे
अल्पवयीन मुलींना किंवा तरुणींना लग्नाचे आमिष दाखवून पळवून नेण्याचे प्रकार नवीन नाहीत, मात्र आता विवाहित महिला घर सोडून जाण्याचे प्रमाण वाढले आहे. यामागे अनेक सामाजिक आणि कौटुंबिक कारणे असल्याचे दिसून येते. पती किंवा सासरच्या मंडळींकडून होणारा शारीरिक व मानसिक छळ (Domestic Harassment), नातेवाईकांचा अनावश्यक हस्तक्षेप, पती-पत्नीमध्ये संवादाचा अभाव किंवा एकमेकांना वेळ न देऊ शकल्यामुळे येणारी निराशा आणि चिडचिड, गरिबी (Poverty) आणि बेरोजगारी (Unemployment) यांसारख्या कारणांमुळे अनेक महिला घर सोडण्याचा निर्णय घेतात.
काही प्रकरणांमध्ये, वैवाहिक जीवन अधिक सुखी असावे या अपेक्षेने किंवा सोशल मीडियाच्या (Social Media) माध्यमातून झालेल्या ओळखीनंतर प्रेमप्रकरणात अडकून काही तरुणी आणि नवविवाहिता घरातून निघून जात असल्याचेही समोर आले आहे. धक्कादायक बाब म्हणजे, काही महिला आपल्या लहान मुलांना (Infants), तर काही जाणत्या वयातील मुलांना सोडून जाण्यासही मागेपुढे पाहत नाहीत. रावेत (Ravet) पोलीस ठाण्याच्या हद्दीतील एका घटनेत, एक महिला आपल्या दीड वर्षाच्या मुलाला अनोळखी व्यक्तीकडे सोपवून पळून गेल्याचे पोलीस तपासात उघड झाले आहे.
आकडेवारी आणि तपासातील अडचणी
पिंपरी-चिंचवड पोलीस आयुक्तालयाच्या आकडेवारीनुसार, जानेवारी २०२४ ते फेब्रुवारी २०२५ दरम्यान ८४० बेपत्ता महिलांचा शोध लागलेला नाही. याच काळात अल्पवयीन मुला-मुलींच्या बेपत्ता होण्याची प्रकरणेही चिंताजनक आहेत. ४८१ अल्पवयीन मुली बेपत्ता झाल्या होत्या, त्यापैकी ४०० मुलींना शोधण्यात पोलिसांना यश आले आहे. तर, १७१ बेपत्ता मुलांपैकी १५८ मुलांना शोधण्यात आले आहे. अल्पवयीन मुलींच्या बाबतीत प्रेमाचे किंवा लग्नाचे आमिष, रागाच्या भरात घेतलेला निर्णय, पैशांचे आमिष किंवा कौटुंबिक कारणे अनेकदा समोर येतात.
पोलीस बेपत्ता व्यक्तींची नोंद त्यांच्या वेबसाइटवर आणि संबंधित पोलीस ठाण्यात घेतात. स्थानिक पोलीस ठाण्याचे शोधपथक आणि ‘ऑपरेशन मुस्कान’ (‘Operation Muskan’) सारख्या विशेष मोहिमांमार्फत (विशेषतः अल्पवयीन मुलांसाठी) तपास केला जातो. मात्र, अनेकदा तपासात पोलिसांना तांत्रिक अडचणी येतात. काही वेळा, बेपत्ता झालेली सज्ञान महिला तिच्या प्रियकरासोबत स्वतःच्या मर्जीने पळून गेलेली असते. पोलिसांनी तिचा शोध घेऊन संपर्क साधल्यास, ती स्वखुशीने आल्याचे सांगते आणि परत येण्यास किंवा पोलिसांना सहकार्य करण्यास नकार देते. अशा परिस्थितीत कायदेशीर मर्यादांमुळे पोलिसांचे हात बांधले जातात आणि कुटुंबीयांना मात्र आपल्या माणसाच्या प्रतीक्षेत राहावे लागते.
Title : Pimpri Chinchwad Missing Women Cases Police Data
