School Trip Rules | दिवाळीची सुट्टी संपताच राज्यभरातील शाळांमध्ये शैक्षणिक सहलींची उत्सुकता वाढू लागली आहे. विद्यार्थ्यांच्या सर्वांगीण विकासात या सहलींचा महत्त्वपूर्ण वाटा असतो. मित्रमैत्रीण, शिक्षक, प्रवास आणि नवनवीन ठिकाणांची ओळख या माध्यमातून विद्यार्थ्यांच्या आठवणी समृद्ध होतात. मात्र, सहलींच्या वाढत्या प्रमाणामुळे सुरक्षेचे प्रश्नही गंभीरपणे पुढे येत आहेत. त्यातच रायगड (Raigad) जिल्ह्यात समुद्रकिनाऱ्यांवर घडलेल्या दुर्घटनांच्या पार्श्वभूमीवर स्थानिक प्रशासनाने शिक्षक आणि विद्यार्थ्यांसाठी नवीन नियम लागू केले आहेत. या नियमावलीमुळे सहलीदरम्यान सुरक्षा आणि शिस्त यांवर अधिक भर दिला जाईल. (Maharashtra School Trip Guidelines)
रायगड जिल्ह्यातील अलिबाग, काशिद, मुरूड या लोकप्रिय समुद्रकिनाऱ्यांवर दरवर्षी मोठ्या प्रमाणात शैक्षणिक सहली येतात. समुद्राकाठच्या परिसरात विद्यार्थ्यांची वर्दळ वाढलेली असते. अशा वेळी समुद्रातील भरती-ओहोटी, पाण्याची खोली आणि वेग यांचा योग्य अंदाज न आल्याने अपघात होण्याची शक्यता वाढते. अलीकडेच काशिद समुद्रकिनारी खासगी क्लासच्या सहलीतील एक शिक्षक आणि एक विद्यार्थी बुडाल्याची दुःखद घटना घडली होती. त्यानंतर सुरक्षिततेसाठी कठोर नियम करण्याची गरज निर्माण झाली. म्हणूनच आता समुद्रकिनाऱ्यावर विद्यार्थ्यांना पाण्यात उतरण्यास मनाई करण्यात आली आहे. समुद्रकिनाऱ्यावर सूचना फलक लावून याबाबत स्पष्ट माहिती देण्यात येणार आहे.
सहलींसाठी सुरक्षा नियमावली लागू :
स्थानिक प्रशासनाने जारी केलेल्या नियमावलीनुसार शैक्षणिक सहली घेणाऱ्या शाळांनी विद्यार्थ्यांच्या सुरक्षेला सर्वोच्च प्राधान्य द्यावे. विद्यार्थ्यांची संख्या, वयोगट, प्रवासमार्ग, राहण्याची व्यवस्था, भोजन आणि आपत्कालीन परिस्थितीसाठी आवश्यक वैद्यकीय सुविधा यांची आधीच सविस्तर आखणी करणे बंधनकारक ठरणार आहे. शिक्षक आणि सहलीसोबत येणाऱ्या मार्गदर्शकांना जबाबदाऱ्या ठरवून दिल्या जाणार असून, समुद्राजवळ विद्यार्थ्यांच्या हालचालींवर सतत लक्ष ठेवणे आवश्यक असेल. राज्य शिक्षण विभागानेही सर्व शाळांना ही नियमावली काटेकोरपणे पाळण्याचे आवाहन केले आहे. (Maharashtra School Trip Guidelines)
मुरूड समुद्रकिनारी काही महिन्यांपूर्वी पुण्यातील इनामदार महाविद्यालयाच्या 13 विद्यार्थ्यांचा समुद्रात बुडून मृत्यू झाल्याने राज्यभर खळबळ उडाली होती. त्या घटनेचा धडा घेत जिल्हा प्रशासनाने आता आणखी कडक भूमिका घेतली आहे. समुद्र किनाऱ्यावर विद्यार्थ्यांनी अनधिकृतपणे किंवा शिक्षकांच्या अनुपस्थितीत पाण्यात जाण्याचा कोणताही प्रयत्न करणे पूर्णपणे बंदीस्त करण्यात आले आहे. या निर्णयामुळे अशा धोकादायक दुर्घटना पुन्हा घडू नयेत यावर भर दिला जात आहे.
School Trip Rules | शैक्षणिक सहलींसाठी नव्या एसटी बस :
शैक्षणिक सहलींच्या सुरक्षिततेबाबतच्या नियमांसोबतच विद्यार्थ्यांना आणि शिक्षकांना सुखद बातमीही देण्यात आली आहे. यावर्षी अभ्यास सहलींसाठी राज्य परिवहन महामंडळ नव्या कोऱ्या एसटी बसगाड्या उपलब्ध करून देणार आहे. परिवहन मंत्री प्रताप सरनाईक (Pratap sarnaik) यांनी दिलेल्या माहितीनुसार राज्यातील 251 आगारांमधून दररोज 800 ते 1000 एसटी बस शाळा आणि महाविद्यालयांना सहलींसाठी दिल्या जाणार आहेत. त्यामुळे सहलींचे नियोजन करणाऱ्या शाळांना सुरक्षित, विश्वासार्ह आणि आरामदायी प्रवासाची सुविधा मिळणार आहे. (School Trips in Maharashtra)
सहलींच्या सुरक्षिततेबाबत बदल करण्यात येत असताना विद्यार्थी, पालक आणि शिक्षक या तीनही घटकांनी या नियमांचे पालन करणे महत्त्वाचे आहे. प्रशासनाने केलेले बदल हे अपघात टाळण्याच्या दृष्टीने सकारात्मक पाऊल मानले जात असून, येत्या काळात शैक्षणिक सहली अधिक सुरक्षित आणि नियोजनबद्ध होतील असा विश्वास व्यक्त केला जात आहे.
