Mumbai Pune Expressway | मुंबई-पुणे एक्सप्रेसवेवरून प्रवास करणाऱ्या प्रवाशांसाठी मोठी आनंदाची बातमी समोर आली आहे. खंडाळा घाटातील धोकादायक, वळणदार आणि अपघात-प्रवण मार्गाला पर्याय म्हणून उभारण्यात येत असलेल्या ‘मिसिंग लिंक’ प्रकल्पाने 96% पेक्षा जास्त बांधकाम पूर्ण केले आहे. या प्रकल्पातील सर्वात महत्त्वाचा घटक मानला जाणारा टायगर व्हॅलीजवळील 650 मीटर लांबीचा केबल-स्टेड पूल आता अंतिम टप्प्यात पोहोचला आहे. हवामानाच्या अडथळ्यांवर मात करत हा पूल पूर्णत्वाकडे वाटचाल करत असून पुढील काही महिन्यांत त्याचे काम पूर्ण होण्याची शक्यता व्यक्त केली जात आहे. (Mumbai Pune Expressway)
या प्रकल्पामुळे मुंबई-पुणे या दोन महत्त्वाच्या शहरांमधील प्रवास अधिक जलद आणि सुरक्षित होणार आहे. सध्या घाटातील वळणांमुळे आणि वाहतूक कोंडीमुळे प्रवास वेळ वाढतो. मात्र, मिसिंग लिंक मार्ग सुरू झाल्यानंतर प्रवास सुमारे 30 मिनिटांनी कमी होणार असून एकूण अंतर साधारण 6 किलोमीटरने घटणार आहे.
केबल-स्टेड पूलाचे काम अंतिम टप्प्यात :
लोणावळा–खंडाळा (Lonawala – Khandala) दरम्यानच्या दुर्गम आणि दरीयुक्त भूप्रदेशातून उभारत असलेल्या या पुलाच्या कामाला गेल्या काही महिन्यांत वेग आला आहे. डेकचा शेवटचा ‘जॉइंट’ जोडण्याचे कामच आता बाकी असून योग्य हवामान मिळाल्यास पुढील चार महिन्यांत हा टप्पा पूर्ण होईल, अशी माहिती एमएसआरडीसीच्या अधिकाऱ्यांनी दिली आहे.
पुलाची उंची जमिनीपासून जवळपास 100 मीटर असून जोरदार वारे, मुसळधार पाऊस आणि दरीतील खोली यामुळे कामात विलंब झाला. तरीसुद्धा अभियांत्रिकीदृष्ट्या अत्यंत कठीण मानला जाणारा हा भाग आता पूर्णत्वास येत आहे. या पुलामुळे घाटातील अपघात-प्रवण वळणांचा त्रासही मोठ्या प्रमाणात कमी होणार आहे. (Khandala Ghat Bypass)
Mumbai Pune Expressway | 13.3 किलोमीटरचा अत्याधुनिक कॉरिडॉर :
हा संपूर्ण 13.3 किलोमीटरचा मिसिंग लिंक मार्ग 8 लेनचा, पूर्णपणे नियंत्रित प्रवेश असलेला अत्याधुनिक कॉरिडॉर आहे. तो 120 किमी प्रतितास वेगाने प्रवास करण्यासाठी डिझाइन करण्यात आला आहे. यामुळे टाइम सेव्हिंग तर होईलच, पण वाहतुकीचा प्रवाह अधिक सुव्यवस्थित होणार आहे. (Mumbai Pune Expressway)
जुना घाटमार्ग हा अपघात आणि ट्रॅफिक snarls यासाठी ओळखला जायचा. विशेषतः विकेंडला आणि पावसाळ्यात वाहतुकीची कोंडी मोठ्या प्रमाणात वाढते. मिसिंग लिंक सुरू झाल्यानंतर प्रवाशांना हा घाटमार्ग पूर्णपणे टाळता येणार आहे, जे या प्रकल्पाचे सर्वात मोठे आकर्षण आहे.
उद्घाटन 2026 मध्ये ढकलले; पुढील सहा महिन्यांत मार्ग खुला होण्याची शक्यता :
एमएसआरडीसीकडून मिळालेल्या माहितीनुसार प्रकल्पातील अनेक घटक पूर्ण झाले असले तरी उद्घाटनाची अधिकृत तारीख अजून निश्चित झालेली नाही. अगोदर अपेक्षित असलेली 2025 मधील उद्घाटन तारीख आता 2026 पर्यंत ढकलल्याचे समोर येत आहे.
तरीही, अधिकाऱ्यांचे मत आहे की पुढील सहा महिन्यांत म्हणजेच 2026 च्या पहिल्या सहामाहीत हा मार्ग वाहतुकीसाठी खुला होण्याची दाट शक्यता आहे. त्यामुळे मुंबई-पुणे प्रवाशांची प्रतीक्षा लवकरच संपणार आहे.
