MSRDC | महाराष्ट्र राज्य रस्ते विकास महामंडळाने (MSRDC) मुंबई आणि पुणे या दोन महत्त्वाच्या शहरांना जोडणाऱ्या यशवंतराव चव्हाण मुंबई-पुणे द्रुतगती महामार्गाच्या (Mumbai-Pune Expressway) विस्तारीकरणाचा महत्त्वाकांक्षी निर्णय घेतला आहे. वाढती वाहतूक कोंडी आणि भविष्यातील गरजा लक्षात घेऊन हा महामार्ग आता तब्बल दहा पदरी करण्याचा भव्य आराखडा तयार करण्यात आला आहे, ज्यामुळे या दोन शहरांमधील प्रवास अधिक जलद आणि सुलभ होणार आहे.
आठ ऐवजी दहा पदरी, खर्चात वाढ
सुरुवातीला हा ९४.६ किलोमीटर लांबीचा महामार्ग आठ पदरी करण्याची योजना होती. मात्र, वाढत्या वाहनांची संख्या आणि भविष्यातील दळणवळणाची गरज विचारात घेऊन, राज्य रस्ते विकास महामंडळाने (MSRDC) आता तो दहा पदरी करण्याचा निर्णय घेतला आहे. या बदलामुळे प्रकल्पाच्या खर्चात सुमारे १४२० कोटी रुपयांची वाढ होणार आहे.
या महत्त्वाकांक्षी प्रकल्पाचा एकूण अंदाजित खर्च आता १४,२६० कोटी रुपये इतका असेल. प्रकल्पाचे काम २०२६ मध्ये सुरू होऊन, ते २०३० पर्यंत पूर्ण करण्याचे नियोजन आहे. हा प्रकल्प ‘हायब्रीड ॲन्युइटी मॉडेल’ (Hybrid Annuity Model – HAM) अंतर्गत विकसित केला जाणार आहे. या मॉडेलनुसार, प्रकल्पासाठी लागणाऱ्या एकूण खर्चापैकी ४०% निधी सरकार उपलब्ध करेल, तर उर्वरित ६०% निधी खाजगी विकासक उभारतील.
‘मिसिंग लिंक’ अंतिम टप्प्यात, टोल करार वाढणार
सध्या या महामार्गावरील अत्यंत महत्त्वाच्या १३ किलोमीटर लांबीच्या ‘मिसिंग लिंक’ प्रकल्पाचे काम अंतिम टप्प्यात आले आहे आणि ते लवकरच पूर्णत्वास जाईल अशी अपेक्षा आहे. हा भाग वाहतुकीसाठी खुला झाल्यावर प्रवासाचा वेळ आणखी कमी होईल. या महामार्गावरील सध्याचा टोल वसुलीचा करार २०४५ पर्यंत वैध आहे.
महामार्ग दहा पदरी करण्याच्या या नवीन विस्तारामुळे हा टोल करार आणखी काही वर्षांसाठी वाढवला जाण्याची शक्यता आहे. या विस्तारीकरणामुळे मुंबई आणि पुणे या दोन्ही महानगरांमधील कनेक्टिव्हिटी सुधारेल, विकासाला गती मिळेल आणि दररोज प्रवास करणाऱ्या लाखो प्रवाशांचा वेळ वाचेल.
