MHT-CET | राज्य सामाईक प्रवेश परीक्षा कक्षाने (State CET Cell) (राज्य सामाईक प्रवेश परीक्षा कक्ष/सीईटी सेल) एमएचटी-सीईटी (MHT-CET) परीक्षेदरम्यान तांत्रिक अडचणींमुळे प्रभावित झालेल्या विद्यार्थ्यांसाठी दिलासादायक निर्णय घेतला आहे. अभियांत्रिकी (Engineering), औषधनिर्माणशास्त्र (Pharmacy) आणि कृषी (Agriculture) अभ्यासक्रमांच्या प्रवेशासाठी झालेल्या परीक्षेतील तांत्रिक बिघाडामुळे बाधित झालेल्या विद्यार्थ्यांची पुनर्परीक्षा ५ मे रोजी आयोजित करण्यात आली असून, यासाठीची नवीन प्रवेशपत्रे ऑनलाइन उपलब्ध करून देण्यात आली आहेत.
सर्व्हर समस्येमुळे २८ हजार विद्यार्थी देणार पुन्हा परीक्षा-
मागील महिन्यात २६ एप्रिल रोजी घेण्यात आलेल्या एमएचटी-सीईटी परीक्षेच्या पीसीएम गटादरम्यान अनेक परीक्षा केंद्रांवर सर्व्हरमध्ये मोठ्या प्रमाणात तांत्रिक अडचणी निर्माण झाल्या होत्या. यामुळे हजारो विद्यार्थ्यांना लॉग-इन करणे किंवा परीक्षा पूर्ण करणे शक्य झाले नव्हते, ज्यामुळे विद्यार्थ्यांचे (MHT-CET) मोठे नुकसान झाले होते. या पार्श्वभूमीवर, राज्य सीईटी सेलने तांत्रिक समस्येचा फटका बसलेल्या एकूण २७ हजार ८३७ विद्यार्थ्यांसाठी ही पुनर्परीक्षा घेण्याचे ठरवले आहे.
ही परीक्षा ५ मे रोजी एकाच सत्रात घेतली जाईल. यासाठीची नवीन प्रवेशपत्रे (Hall Tickets) सीईटी सेलच्या संकेतस्थळावर शुक्रवार सकाळपासून उपलब्ध करण्यात आली. शुक्रवार संध्याकाळपर्यंतच्या आकडेवारीनुसार, सुमारे २२ हजार पात्र विद्यार्थ्यांनी त्यांची प्रवेशपत्रे यशस्वीरित्या डाउनलोड केली होती.
एकूण उपस्थिती ७९ टक्के; काही समस्या कायम-
दरम्यान, २२ एप्रिल ते १ मे या कालावधीत पार पडलेल्या एमएचटी-सीईटीच्या (MHT-CET) पीसीबी आणि पीसीएम ग्रुपच्या नियमित परीक्षांसाठी एकूण उपस्थिती ७९.०९ टक्के इतकी नोंदवली गेली. या परीक्षांसाठी नोंदणी केलेल्या ५,७९,०९८ विद्यार्थ्यांपैकी ४,५८,३२५ विद्यार्थ्यांनी परीक्षा दिली, तर १,२०,७७३ विद्यार्थी अनुपस्थित राहिले. परीक्षेच्या विविध सत्रांमध्ये मिळून ही उपस्थिती नोंदवण्यात आली.
पुनर्परीक्षेची घोषणा झाली असली तरी, काही विद्यार्थ्यांनी नवीन प्रवेशपत्र डाउनलोड केल्यानंतरही लॉग-इनमध्ये समस्या येत असल्याची तक्रार सीईटी सेलकडे केली आहे. त्याचबरोबर, काही पालकांनी परीक्षा केंद्रे दूरच्या शहरांमध्ये, जसे की मुंबई (Mumbai), ठाणे (Thane), पुणे (Pune) येथे आल्याने गैरसोय होत असल्याचे म्हटले आहे.
