Manoj Jarange Patil | मराठा आरक्षण आंदोलनाचे नेते मनोज जरांगे पाटील (Manoj Jarange Patil) यांनी दिल्ली (Delhi) येथील जंतरमंतर (Jantar Mantar) येथे सुरू असलेल्या विद्यार्थ्यांच्या आंदोलनाला भेट देत आंदोलकांशी संवाद साधला. आंदोलनाचे प्रमुख चेहरे अभिजीत दीपके (Abhijit Deepke) आणि सोनम वांगचूक (Sonam Wangchuk) यांना पाठिंबा दर्शवत त्यांनी आंदोलन शांततेत सुरू ठेवण्याचे आवाहन केले. तसेच गरज पडल्यास मराठा समाज दिल्लीत येईल, अशी घोषणाही त्यांनी केली.
विद्यार्थ्यांच्या आंदोलनाला पाठिंबा, शांततेचा संदेश :
जंतरमंतर येथे पोहोचल्यानंतर मनोज जरांगे पाटील यांनी आंदोलनाच्या व्यासपीठावरून विद्यार्थ्यांना संबोधित केले. शांततापूर्ण आंदोलनाची ताकद महाराष्ट्राने अनुभवली असून त्याच मार्गाने पुढे जाण्याचा सल्ला त्यांनी दिला. सरकारला सत्तेत आणणारे मतदार हेच सामान्य नागरिक असल्याचे सांगत त्यांनी आंदोलकांना धीर दिला. पुढील काळात आंदोलनकर्त्यांना कोणतीही अडचण आली किंवा त्यांच्यावर अन्याय झाला, तर संपूर्ण राज्य आणि देश तुमच्या पाठीशी उभा राहील, असे त्यांनी जाहीरपणे सांगितले. याचबरोबर जंतरमंतर सोडू नका आणि गरज भासल्यास मराठा बांधव मोठ्या संख्येने दिल्लीत दाखल होतील, असेही त्यांनी स्पष्ट केले.
भाजपला मतदान करणाऱ्या नागरिकांनी पक्ष महत्त्वाचा की आपल्या मुलांचे भविष्य, याचा विचार करण्याची वेळ आली असल्याचेही जरांगे पाटील म्हणाले. मराठा आंदोलनाची पद्धत वेगळी असल्याचे सांगत त्यांनी आंदोलकांनी हाक दिल्यास आपण पुन्हा दिल्लीत येण्याचे आश्वासन दिले. विद्यार्थ्यांच्या प्रश्नासाठी सुरू असलेल्या या आंदोलनात आपण त्यांच्या सोबत कायम उभे राहू, असा शब्दही त्यांनी दिला.
Manoj Jarange Patil | संसदेकडे न जाण्याचा सल्ला, सरकारला इशाराही :
विद्यार्थ्यांच्या आंदोलनाकडे केवळ राजकारण म्हणून न पाहता देशातील सर्वसामान्य आणि गरीब कुटुंबातील विद्यार्थ्यांच्या संघर्षाच्या दृष्टीने पाहण्याची गरज असल्याचे मनोज जरांगे पाटील यांनी सांगितले. देशाची राजधानी असलेल्या दिल्लीत न्याय मिळावा म्हणून विद्यार्थी एकत्र आले आहेत, त्यामुळे त्यांना समाजाने साथ दिली पाहिजे, असे त्यांनी नमूद केले. सरकारकडून आंदोलकांवर कठोर कारवाई झाली असेल, तर त्यांच्या मदतीला जाणे हे आपले कर्तव्य असल्याचेही त्यांनी स्पष्ट केले.
आंदोलनाबाबत माहिती घेतल्यानंतर विद्यार्थ्यांनी संयम राखावा आणि संसदेकडे मोर्चा नेण्याचा प्रयत्न करू नये, असा स्पष्ट सल्ला त्यांनी दिला. अशा प्रकारचा प्रयत्न झाल्यास आंदोलन मोडून काढण्याची शक्यता असल्याचे त्यांनी सांगितले. शांततापूर्ण आंदोलनातूनच न्याय मिळू शकतो, हे महाराष्ट्रातील आंदोलनांनी दाखवून दिले असल्याचे ते म्हणाले. तसेच भविष्यात आंदोलनकर्त्यांवर पुन्हा हल्ला झाल्यास देशभरात भाजपच्या मंत्र्यांना फिरणे कठीण होईल, असा इशाराही त्यांनी यावेळी दिला.
