Israel Iran war | मध्य पूर्वेतील तणाव पुन्हा एकदा उफाळून आला आहे. अमेरिकेच्या मध्यस्थीनंतर जाहीर करण्यात आलेल्या युद्धविरामाच्या घोषणेनंतरही इराणने इस्रायलवर पुन्हा मिसाइल हल्ले केले आहेत. या हल्ल्यांत तिघांचा मृत्यू झाला असून, आठ जण जखमी झाले आहेत. इस्रायलच्या दक्षिण भागातील बीरशेवा शहरात एका अपार्टमेंट इमारतीवर बॅलिस्टिक मिसाइल कोसळल्याने मोठे नुकसान झाले.
हल्ल्यानंतर इस्रायलच्या आपत्कालीन सेवांनी मदतकार्य सुरु केले असून, ‘मॅगन डेविड अदोम’ या बचाव सेवेने मृत आणि जखमींची माहिती दिली आहे. हल्ल्याच्या वेळी नागरिकांना जवळपास दोन तास बंकरमध्ये आसरा घ्यावा लागला होता. या घटनेने नागरिकांमध्ये भीतीचे वातावरण निर्माण झाले आहे.
युद्धविरामाच्या घोषणेनंतरही मिसाइल अलर्ट :
इराणकडून स्थानिक वेळेनुसार सकाळी ४ वाजता एकतर्फी युद्धविराम घोषित करण्यात आला होता. मात्र काही तासांतच पुन्हा मिसाइल हल्ले करण्यात आले. इराणने स्पष्ट केलं की, हा युद्धविराम सशर्त असून तो इस्रायलच्या आक्रमकतेवर अवलंबून आहे. त्यामुळे युद्धविराम फक्त कागदावरच राहिला, अशी स्थिती निर्माण झाली आहे.
इस्रायलच्या दक्षिण आणि मध्य भागात पुन्हा मिसाइल अलर्ट वाजवण्यात आले आहेत. नागरिकांना सावध राहण्याचे आदेश देण्यात आले आहेत. इस्रायली लष्कर (IDF) सतर्क अवस्थेत असून, संभाव्य प्रतिहल्ल्याची तयारी सुरु आहे.
Israel Iran war | ट्रंप यांच्या युद्धविरामाच्या घोषणेला विरोध :
अमेरिकेचे माजी अध्यक्ष डोनाल्ड ट्रंप यांनी त्यांच्या ट्रुथ सोशल प्लॅटफॉर्मवर युद्धविराम जाहीर झाल्याचा दावा केला होता. त्यांच्या म्हणण्यानुसार, इराण 6 तासांत युद्धविराम सुरु करेल आणि इस्रायल 12 तासांनी सामील होईल. 24 तासांत युद्ध पूर्णपणे संपुष्टात येईल असा दावा त्यांनी केला होता.
मात्र, इराणच्या परराष्ट्र मंत्रालयाने ट्रंप यांच्या दाव्याला फेटाळून लावलं आहे. तेहरानने स्पष्ट केलं आहे की, वॉशिंग्टनकडून कोणतीही अधिकृत प्रस्तावना मिळालेली नाही, आणि त्यांचा युद्धविराम ही फक्त तात्पुरती घोषणा आहे, ती देखील इस्रायलच्या प्रतिसादावर अवलंबून आहे.
ऑपरेशन रायझिंग लायनमुळे वाढला संघर्ष ;
या संघर्षाची सुरुवात 12 दिवसांपूर्वी इस्रायलच्या ‘ऑपरेशन रायझिंग लायन’ या मोहिमेमुळे झाली. या कारवाईत इस्रायलने इराणमधील लष्करी आणि अण्वस्त्र केंद्रांवर लक्ष केले होते. त्याच्या प्रत्युत्तरात इराणकडून सातत्याने बॅलिस्टिक मिसाइल हल्ले करण्यात आले.
मंगळवारी सकाळच्या हल्ल्यात इराणने आठ मिसाइल्स डागल्या. त्यापैकी एक मिसाइल बीरशेवा येथील अपार्टमेंटवर कोसळली. या हल्ल्यांमुळे फक्त नागरिकांचा बळी गेला नाही, तर याने पुन्हा एकदा युद्धविरामाच्या शक्यतेवर प्रश्नचिन्ह उभं केलं आहे. तणाव मिटण्याऐवजी तो अधिक गंभीर होत चालल्याची स्थिती निर्माण झाली आहे.
