High Interest on FD | भारतीय रिझर्व्ह बँकेने अलीकडेच रेपो दरात घट केली असली तरी, एका खासगी बँकेने मुदत ठेवींवरील (Fixed Deposit) व्याजदरात मोठी वाढ केली आहे. फेब्रुवारीनंतर एप्रिलमध्ये रिझर्व्ह बँकेने दोन वेळेस रेपो दरात ०.२५ टक्क्यांची घट केली, ज्यामुळे रेपो दर ६.५० टक्क्यांवरून ६.०० टक्क्यांवर आला. बहुतेक बँकांनी याचा परिणाम म्हणून त्यांच्या एफडीच्या व्याजदरात कपात केली. मात्र, सूर्योदय स्मॉल फायनान्स बँकेने (Suryoday Small Finance Bank) या परिस्थितीतही एफडीच्या व्याजदरात तब्बल ४१ बेसिस पॉइंट्सची वाढ करून ग्राहकांना सुखद धक्का दिला आहे.
मुदत ठेवीवर मिळणार ९.१० टक्क्यांपर्यंत व्याज
बँकेच्या नवीन घोषणेनुसार, आता सामान्य ग्राहकांना त्यांच्या मुदत ठेवीवर ४ टक्के ते ८.६० टक्क्यांपर्यंत व्याज मिळू शकते. याचबरोबर, ज्येष्ठ नागरिकांसाठी ही योजना अधिक फायदेशीर ठरली आहे, कारण त्यांना याच एफडीवर ४.५ टक्के ते ९.१० टक्क्यांपर्यंत व्याज बँकेकडून दिले जाणार आहे. विशेष म्हणजे, ५ वर्षांच्या मुदत ठेवीवर सूर्योदय स्मॉल फायनान्स बँक सामान्य नागरिकांना ८.६० टक्के आणि ज्येष्ठ नागरिकांना ९.१० टक्के इतका उच्च व्याजदर देत आहे.
मोठ्या बँकांनी घटवले व्याजदर
या परिस्थितीत, भारतीय स्टेट बँक (State Bank of India – SBI), एचडीएफसी बँक (HDFC Bank), आयसीआयसीआय बँक (ICICI Bank) यांसारख्या मोठ्या आणि नामांकित बँकांनी देखील त्यांच्या एफडीच्या व्याजदरात घट केली आहे. शिवालिक स्मॉल फायनान्स बँक (Shivalik Small Finance Bank) आणि उत्कर्ष स्मॉल फायनान्स बँक (Utkarsh Small Finance Bank) यांसारख्या लहान बँकांनीही रेपो दरातील कपातीनंतर एफडीचे दर कमी केले आहेत. अशा स्थितीत, सूर्योदय स्मॉल फायनान्स बँकेने व्याजदर वाढवून एक वेगळा आणि आकर्षक पर्याय गुंतवणूकदारांसाठी खुला केला आहे.
Title : High Interest on FD: Attractive Scheme by This Bank
