Gold Price | देशांतर्गत बाजारात सलग दोन दिवसांच्या तेजीला आता ब्रेक लागला असून सोने आणि चांदीच्या दरात घसरण नोंदवली गेली आहे. गुंतवणूकदारांनी नफा वसुलीचा मार्ग स्वीकारल्यामुळे मंगळवारी सकाळी वायदे बाजारात दोन्ही मौल्यवान धातूंच्या किमती खाली आल्या आहेत. चांदीच्या दरात मोठी घट झाली असून सोन्याचे भावही स्वस्त झाले आहेत.
देशांतर्गत वायदे बाजारातील हालचाली :
मल्टी कमोडिटी एक्सचेंज (Multi Commodity Exchange) वर एप्रिल डिलिव्हरीच्या सोन्याच्या दरात 1.6 टक्क्यांची घट झाली आहे. त्यामुळे सोन्याचा भाव तब्बल 2500 रुपयांनी कमी होत एका तोळ्याला 1,55,546 रुपयांवर आला आहे. याच वेळी चांदीच्या वायदे दरात 4 टक्क्यांची मोठी घसरण झाली असून, चांदीचा भाव 11,000 रुपयांनी कमी होऊन 2,51,544 रुपयांवर पोहोचला आहे.
बाजारतज्ज्ञांच्या मते, मागील काही दिवसांत झालेल्या जोरदार वाढीनंतर गुंतवणूकदारांनी नफा बुकिंग केल्यामुळे ही घसरण झाली आहे. त्यामुळे देशांतर्गत कमोडिटी बाजारात सोन्या-चांदीच्या किमतींमध्ये अचानक नरमाई दिसून येत आहे. या घसरणीमुळे आगामी काळात दरांमध्ये आणखी चढ-उतार होण्याची शक्यता व्यक्त केली जात आहे.
जागतिक बाजारातील घडामोडी :
आंतरराष्ट्रीय स्तरावरही सोन्याच्या किमती दबावाखाली राहिल्या आहेत. सुरुवातीच्या व्यवहारात सोन्याचे दर 1.4 टक्क्यांनी घसरून 5000 डॉलर प्रति औंसच्या खाली आले आहेत. 29 जानेवारी रोजी सोन्याने गाठलेल्या उच्चांकाच्या तुलनेत सध्याचे दर सुमारे 10 टक्क्यांनी कमी झाले आहेत. सिंगापूरमध्ये सकाळी 8 वाजता स्पॉट गोल्ड 0.5 टक्क्यांनी घसरून 5032.53 डॉलर प्रति औंसवर व्यवहार करत होते, तर चांदीचे दर 1.8 टक्क्यांनी म्हणजेच 81.92 डॉलरने घसरले आहेत.
दरम्यान, अमेरिकन डॉलर निर्देशांक (Dollar Index) 96.82 वरून वाढून 97.01 वर पोहोचल्यामुळे विदेशी गुंतवणूकदारांसाठी डॉलर आधारित सोनं महाग झालं आहे. अमेरिकेतील रोजगार आणि महागाईशी संबंधित आकडेवारी जाहीर होण्याआधी गुंतवणूकदार सावध भूमिका घेत आहेत. सराफा बाजारात 9 फेब्रुवारी रोजी 24 कॅरेट सोन्याचा दर 1,54,880 रुपये होता, तर 22 कॅरेट सोनं 1,51,160 रुपये, 20 कॅरेट 1,37,840 रुपये, 18 कॅरेट 1,25,450 रुपये आणि 14 कॅरेट सोनं 99,900 रुपये तोळा दराने विकले जात होते. गेल्या वर्षभरात मोठी वाढ झाल्यानंतर आता झालेल्या या घसरणीमुळे दागिने खरेदी करणाऱ्यांना दिलासा मिळाला आहे.
