Gold Price | जागतिक पातळीवर सुरू असलेल्या युद्धजन्य परिस्थितीचा थेट परिणाम आता मौल्यवान धातूंच्या बाजारावर दिसू लागला आहे. अमेरिका (United States) आणि इराण (Iran) यांच्यातील संघर्षामुळे सुरक्षित गुंतवणूक म्हणून ओळखल्या जाणाऱ्या सोन्या-चांदीकडे गुंतवणूकदारांचा ओढा वाढला आहे. याच पार्श्वभूमीवर अवघ्या दोन दिवसांत सोन्या-चांदीच्या दरात ऐतिहासिक वाढ नोंदवली गेली असून, सर्वसामान्य खरेदीदार चकीत झाले आहेत.
जळगाव सराफ बाजारात दरवाढीचा धडाका :
जळगाव येथील सराफ बाजारात सलग दुसऱ्या दिवशी सोन्या आणि चांदीच्या किमतींमध्ये मोठी झेप घेतल्याचे चित्र आहे. गेल्या वर्षीपासूनच या दोन्ही धातूंचे दर सातत्याने वाढत असताना, सध्याच्या युद्धस्थितीमुळे दरवाढीला अधिक वेग मिळाला आहे. युद्ध सुरू झाल्यानंतर एका दिवसातच सोन्याच्या किमती तब्बल ८ हजार रुपयांनी वाढल्या होत्या, अशी माहिती सराफ व्यावसायिकांकडून देण्यात आली आहे.
आजच्या व्यवहारात जळगावच्या बाजारात दुसऱ्या दिवशीही सोन्याच्या दरात २ हजार ५०० रुपयांची भर पडली आहे. त्याचबरोबर चांदीच्या दरातही ५ हजार रुपयांची वाढ नोंदवली गेली आहे. सलग दोन दिवस चाललेल्या या वाढीमुळे बाजारात खरेदी-विक्री करताना ग्राहक आणि व्यापारी दोघेही सावध भूमिका घेताना दिसत आहेत. वाढत्या दरांमुळे दागिन्यांच्या खरेदीवर मोठा परिणाम होत असल्याचेही सांगण्यात येत आहे.
Gold Price | दोन दिवसांत विक्रमी वाढ :
आजच्या दरांनुसार १० ग्रॅम सोन्याचा भाव जीएसटीसह थेट १ लाख ७५ हजार ६१५ रुपयांपर्यंत पोहोचला आहे. इतक्या उच्च किमतीमुळे सामान्य नागरिकांसाठी सोने खरेदी करणे केवळ स्वप्न ठरत असल्याची भावना व्यक्त केली जात आहे. दुसरीकडे चांदीच्या दरांनीही उच्चांक गाठला असून जीएसटीसह चांदीचा दर ३ लाख ३ हजार ८५० रुपये इतका झाला आहे.
युद्धाच्या पार्श्वभूमीवर केवळ दोन दिवसांत सोन्याच्या दरात एकूण ११ हजार ५०० रुपयांची वाढ झाली असून, चांदीच्या किमतींमध्ये तब्बल २५ हजार रुपयांची उसळी घेतल्याची नोंद आहे. ही वाढ आतापर्यंतची सर्वात मोठी दरवाढ मानली जात आहे. जागतिक अनिश्चिततेमुळे गुंतवणूकदार सुरक्षित पर्याय म्हणून सोन्या-चांदीकडे वळत असल्याने मागणी वाढली असून, त्याचा थेट परिणाम किमतींवर होत आहे.
दरम्यान, या संदर्भात सराफ बाजारातील जाणकारांनी स्पष्ट केले आहे की, सध्या समोर आलेले दर प्राथमिक स्वरूपाचे आहेत. या माहितीच्या आधारे कोणताही थेट किंवा अप्रत्यक्ष गुंतवणूक निर्णय घेऊ नये, असा सल्ला देण्यात आला आहे. सोने किंवा चांदीमध्ये गुंतवणूक करण्यापूर्वी संबंधित क्षेत्रातील तज्ज्ञांचा सल्ला घेणे आवश्यक असल्याचेही त्यांनी नमूद केले आहे. सध्याच्या घडीला युद्धस्थिती कायम राहिल्यास येत्या काळात दर आणखी वाढण्याची शक्यता नाकारता येत नाही.
