Pune GBS l पुण्यात गुइलेन-बारे सिंड्रोम (GBS) या न्यूरोलॉजिकल आजाराचा धोका पुन्हा वाढण्याची शक्यता निर्माण झाली आहे. सिंहगड रोड परिसरात जीबीएसचे नवीन संशयित रुग्ण आढळले असून, त्यामुळे आरोग्य यंत्रणा सतर्क झाली आहे. या भागात दूषित पाण्यामुळे संसर्ग वाढण्याची शक्यता व्यक्त केली जात आहे.
आरोग्य विभागाची महानगरपालिकेला पत्राद्वारे सूचना :
महानगरपालिकेच्या पाणीपुरवठा विभागाला आरोग्य विभागाने पत्र पाठवले असून, त्यामध्ये सिंहगड रोड परिसरात शुद्ध पाणी पुरवठा करण्याची मागणी करण्यात आली आहे. तपासणीत पिण्यायोग्य नसलेले पाणी आढळल्याने नागरिकांच्या आरोग्याला धोका निर्माण झाला आहे.
जीबीएस हा संसर्गजन्य आजार नसला तरी दूषित पाण्यामुळे पचनसंस्थेशी संबंधित संसर्ग होऊन प्रतिकारशक्ती कमी होण्याचा धोका असतो. त्यामुळे आरोग्य विभागाने तातडीने पाणी पुरवठ्याची चौकशी करून योग्य त्या सुधारणा करण्याचा सल्ला दिला आहे.
Pune GBS l महानगरपालिकेने तातडीने उपाययोजना करण्याची गरज :
शहरात जीबीएसचा प्रादुर्भाव रोखण्यासाठी पुणे महानगरपालिकेने तातडीने योग्य उपाययोजना कराव्यात, अशी मागणी आरोग्य तज्ज्ञांकडून केली जात आहे. पिण्याच्या पाण्याची गुणवत्ता नियमित तपासून नागरिकांना स्वच्छ आणि सुरक्षित पाणीपुरवठा केला गेला पाहिजे.
जीबीएसची काही सामान्य लक्षणे :
कमकुवतपणा: हे जीबीएसचे सर्वात सामान्य लक्षण आहे. हे सहसा पाय आणि हातांमध्ये सुरू होते आणि नंतर शरीराच्या इतर भागांमध्ये पसरते.
मुंग्या येणे किंवा सुन्न होणे: हे लक्षण देखील सामान्य आहे आणि ते सहसा हात आणि पायांमध्ये सुरू होते.
वेदना: काही लोकांना स्नायूंमध्ये किंवा पाठीत वेदना जाणवतात.
चालण्यास अडचण: स्नायूंच्या कमकुवतपणामुळे चालणे कठीण होऊ शकते.
दुहेरी दृष्टी किंवा बोलण्यात अडचण: काही प्रकरणांमध्ये, जीबीएस डोळ्यांच्या स्नायूंना किंवा चेहऱ्याच्या स्नायूंना प्रभावित करू शकतो.
श्वास घेण्यास त्रास: गंभीर प्रकरणांमध्ये, जीबीएस छातीच्या स्नायूंना प्रभावित करू शकतो, ज्यामुळे श्वास घेणे कठीण होते.
हृदयाच्या ठोक्यांमध्ये बदल: काही लोकांना हृदयाच्या ठोक्यांमध्ये बदल जाणवतात.
