EPFO | देशभरातील कोट्यवधी नोकरदारांसाठी महत्त्वाची माहिती समोर आली आहे. कर्मचारी भविष्य निर्वाह निधीशी संबंधित गुंतवणुकीवर मिळणाऱ्या व्याजदराबाबत अखेर स्पष्टता आली आहे. 2025-26 या आर्थिक वर्षासाठी पीएफ ठेवींवर किती व्याज मिळणार, याबाबत अधिकृत निर्णय घेण्यात आला असून त्यामुळे कर्मचाऱ्यांच्या बचतीवर थेट परिणाम होणार आहे.
पीएफ व्याजदर कायम ठेवण्याचा निर्णय :
कर्मचारी भविष्य निर्वाह निधी संघटना (Employees’ Provident Fund Organisation) ने 2025-26 या आर्थिक वर्षासाठी पीएफ ठेवींवरील व्याजदर जाहीर केला आहे. देशातील सुमारे 7.5 कोटी नोकरदारांच्या पगारातून दरमहा पीएफ कपात केली जाते. अशा परिस्थितीत ईपीएफओच्या या निर्णयाकडे सर्वांचे लक्ष लागले होते. संस्थेने यंदाही पीएफवरील व्याजदर 8.25 टक्के इतकाच ठेवण्याचा निर्णय घेतला आहे.
हा निर्णय ईपीएफओच्या सर्वोच्च धोरणात्मक संस्थेने, म्हणजेच सेंट्रल बोर्ड ऑफ ट्रस्टीज Central Board of Trustees (Central Board of Trustees) यांनी घेतला आहे. याचा अर्थ असा की, कर्मचाऱ्यांच्या पीएफ ठेवींवर मिळणाऱ्या परताव्यात कोणतीही घट होणार नाही. मागील वर्षीप्रमाणेच यंदाही तोच दर कायम राहणार असल्याने नोकरदारांना स्थिर आणि सुरक्षित उत्पन्नाचा दिलासा मिळाला आहे. आता हा प्रस्ताव अंतिम मंजुरीसाठी अर्थ मंत्रालयाकडे पाठवला जाणार आहे, त्यानंतर हा व्याजदर खात्यांमध्ये लागू केला जाईल.
EPFO | मागील वर्षांतील व्याजदर आणि गणनेची पद्धत :
गेल्या काही वर्षांतील पीएफ व्याजदर पाहिले तर त्यामध्ये चढ-उतार दिसून येतात. 2024-25 या आर्थिक वर्षातही पीएफवरील व्याज 8.25 टक्के होते. त्याआधी 2023-24 मध्ये हा दर 8.15 टक्क्यांवरून वाढवून 8.25 टक्के करण्यात आला होता. मात्र 2021-22 मध्ये हा व्याजदर 8.10 टक्क्यांपर्यंत खाली आणण्यात आला होता, जो 1977-78 नंतरचा सर्वात कमी दर मानला जातो. त्या काळात अनेक कर्मचाऱ्यांमध्ये चिंता निर्माण झाली होती.
याआधी 2015-16 या वर्षात कर्मचाऱ्यांना 8.80 टक्के इतका उच्च परतावा मिळाला होता, तर 2019-20 आणि 2020-21 या दोन्ही वर्षांत पीएफ व्याजदर 8.50 टक्के इतका होता. पीएफवरील परतावा ठरवताना ईपीएफओ कर्मचाऱ्यांचे पैसे सरकारी रोखे, बाँड्स आणि काही प्रमाणात इक्विटीमध्ये गुंतवते. संपूर्ण वर्षातील या गुंतवणुकीतून मिळालेल्या उत्पन्नाचा आढावा घेतल्यानंतर पुढील वर्षासाठी व्याजदर निश्चित केला जातो. बाजारातील परिस्थिती आणि सुरक्षिततेचा विचार करून हा निर्णय घेतला जात असल्याने पीएफ अजूनही बँक एफडीपेक्षा जास्त आणि विश्वासार्ह पर्याय मानला जातो.
