Dhananjay Munde | राज्यात राजकीय भूकंप घडवत अन्न व नागरी पुरवठा मंत्री धनंजय मुंडे (Dhananjay Munde) लवकरच आपल्या पदाचा राजीनामा देणार आहेत. संतोष देशमुख (Santosh Deshmukh) हत्या प्रकरणानंतर वाढलेल्या संतापाच्या पार्श्वभूमीवर मुख्यमंत्री देवेंद्र फडणवीस (Devendra Fadnavis) यांनी सोमवारी रात्री मुंडेंना राजीनामा देण्याचे स्पष्ट आदेश दिले होते. त्यानुसार, धनंजय मुंडे (Dhananjay Munde) आज सकाळी ११ वाजता मुख्यमंत्र्यांकडे आपला राजीनामा सुपूर्द करण्याची शक्यता आहे.

राजकीय दबावामुळे राजीनाम्याचा निर्णय

संतोष देशमुख हत्या प्रकरणात मुख्य आरोपी वाल्मिक कराड (Walmik Karad) याचा समावेश असल्याचे एसआयटी (SIT) आणि सीआयडी (CID) च्या तपासात निष्पन्न झाले आहे. हा आरोपी धनंजय मुंडेंचा निकटवर्तीय असल्याचेही उघड झाले होते. यामुळे विरोधकांनी धनंजय मुंडे (Dhananjay Munde) यांच्या राजीनाम्याची मागणी अधिक तीव्र केली होती.

गेल्या आठवडाभरापासून राष्ट्रवादी काँग्रेस (NCP) मध्ये मुंडेंच्या राजीनाम्यासाठी दबाव वाढत होता. उपमुख्यमंत्री अजित पवार (Ajit Pawar) यांनी सुरुवातीला मुंडेंच्या बाजूने उभे राहण्याचा प्रयत्न केला. मात्र, मुख्यमंत्री फडणवीस हे राजीनाम्याबाबत ठाम असल्यामुळे अखेर हा निर्णय घ्यावा लागला.

सोमवारी रात्री देवेंद्र फडणवीस, अजित पवार, प्रफुल पटेल (Praful Patel), सुनील तटकरे (Sunil Tatkare) आणि धनंजय मुंडे यांच्या उपस्थितीत देवगिरी बंगल्यावर महत्त्वपूर्ण बैठक पार पडली. जवळपास दोन तास चाललेल्या या बैठकीत, फडणवीस यांनी मुंडेंना राजीनामा देण्याचे आदेश दिले.

Dhananjay Munde | हत्या प्रकरणाचा तपास वेगाने सुरू

९ डिसेंबर २०२४ रोजी संतोष देशमुख यांची हत्या झाली होती. हत्येतील आरोपींवर मकोका (MCOCA) अंतर्गत कारवाई करण्यात आली आहे. तसेच, या प्रकरणाचा खटला लढवण्यासाठी ज्येष्ठ सरकारी वकील उज्ज्वल निकम (Ujjwal Nikam) आणि अॅड. बाळासाहेब कोल्हे (Balasaheb Kolhe) यांची नियुक्ती करण्यात आली आहे. आता आरोपपत्र दाखल झाल्यामुळे हा खटला लवकरच न्यायालयात सुनावणीसाठी येणार आहे.

धनंजय मुंडे यांनी मुख्यमंत्र्यांच्या आदेशाला शिरसावंद्य मानत राजीनामा देण्याचा निर्णय घेतला असला, तरी त्याचा राजकीय भविष्यासाठी मोठा फटका बसण्याची शक्यता आहे. पुढील काही दिवसांत राष्ट्रवादी काँग्रेसच्या नेतृत्वाकडून यावर अधिकृत भूमिका स्पष्ट केली जाईल.